Ադրբեջանի ԱԳՆ-ն մեղադրանքներ է հնչեցրել Բորելի հասցեին

«ԵՄ պաշտոնյայի վերջին սխալ հայտարարությունները, որոնք լրջորեն խեղաթյուրում են իրականությունը, անընդունելի են»,–այս մասին հայտարարել է Ադրբեջանի արտաքին գործերի նախարարության մամուլի քարտուղար Այխան Հաջիզադեն՝ մեղադրանքներ հնչեցնելով ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Ժոզեպ Բորելի հասցեին։

Հաջիզադեն Բորելին մեղադրել է Ադրբեջանի նկատմամբ «կողմնակալության» մեջ, ինչպես նաև պնդել, թե նա աջակցում է «անջատողականությանը»։ 

«Պնդումները, թե Հայաստան և այլ երկրներ տեղափոխված հայ բնակիչները բռնի կերպով վտարվել են տարածաշրջանից, և նրանց թվի միտումնավոր ուռճացումը, սուտ են և վկայում են վտանգավոր միտումի մասին»,– ասել են Ադրբեջանի ԱԳՆ–ից՝ հավելելով․ «Նման կեղծ հայտարարությունները խաթարում են ԵՄ միջնորդական ջանքերը»։

Ադրբեջանի ԱԳՆ–ից նաև կոչ են արել ԵՄ ներկայացուցչին «դադարեցնել նման սադրիչ հայտարարությունները»։

Հիշեցնենք, որ Բորելը, ելույթ ունենալով ԵՄ-Հասարակական կազմակերպություններ Մարդու իրավունքների 25-րդ ֆորումում, անդրադարձել էր նաև հայ-ադրբեջանական հակամարտությանը: Բորելը նշել էր, որ վերջին տարիներին նկատվում է կոշտ ուժի քաղաքականության վերադարձ, երբ ավելի ու ավելի շատ հակամարտություններ են լուծվում ուժի միջոցով: Նա որպես օրինակ է բերել Ադրբեջանի ագրեսիվ գործողությունները:

«Օրինակ՝ տեսեք, թե ինչ է տեղի ունեցել Ադրբեջանում և Հայաստանում։ Վաղուց սառեցված հակամարտության ելքը վճռվեց ռազմական միջամտությամբ, ինչը 150 հազար մարդու ստիպել է տեղահանվել մեկ շաբաթվա ընթացքում: 150 հազար մարդ ստիպված է եղել լքել իր տունը և փախչել։ Իսկ միջազգային հանրությունը զղջաց, մտահոգություն հայտնեց, հումանիտար աջակցություն ուղարկեց, բայց այնուամենայնիվ ամեն բան եղավ ուժի կիրառմամբ»,- նշել էր Բորելը: