Չինաստանը գործարկել է աշխարհում առաջին 4-րդ սերնդի ատոմակայանը

Չինաստանի Շանդուն նահանգում շահագործման է հանձնվել աշխարհում առաջին չորրորդ սերնդի ատոմակայանը (ԱԷԿ): Այս մասին հայտնում է ՏԱՍՍ-ը։

Շիդաովանի ատոմակայանը հագեցած է բարձր ջերմաստիճանի գազով հովացվող ռեակտորով: Փորձնական ռեժիմում կայանը աշխատել է 168 ժամ, որից հետո այն հանձնվել է կոմերցիոն շահագործման։

Չինաստանի Ժողովրդական Հանրապետության էներգետիկայի պետական ​​վարչությունը ժամանակակից ռեակտորի գլխավոր առավելությունն անվանել է նրա անվտանգությունը էլեկտրաէներգիայի արտադրության ոլորտում։

Չորրորդ սերնդի միջուկային էներգիայի տեխնոլոգիաների հետազոտման, մշակման և օգտագործման ոլորտում Չինաստանը հասել է աշխարհում առաջատար մակարդակի։

Դեկտեմբերի սկզբին Ճապոնիայում բացվեց աշխարհի ամենամեծ փորձնական ջերմամիջուկային ռեակտորը՝ JT-60SA-ն։ Այն վեց հարկանի կառույց է, որը գտնվում է Նակա քաղաքում՝ Տոկիոյից հյուսիս։