Ալիևը կրկին միջանցք է պահանջել Հայաստանից

Ադրբեջանից պետք է լինի ազատ հասանելիություն դեպի Նախիջեւան։ Այդ մասին Իլհամ Ալիեւն ասել է Բաքվում կայացած միջազգային կոնֆերանսի ժամանակ իր ելույթում։

«Հայաստանն այժմ երկու տարբերակ ունի։ Նախ նրանք պետք է անհապաղ 42 կմ երկարությամբ երկաթուղի կառուցեն իրենց միջոցներով կամ եվրոպական հիմնադրամների գումարներով։ Մենք սա, ըստ էության, համարում ենք նրանց ինքնիշխան տարածքը, և ինքնիշխանության վերաբերյալ որևէ վերապահում չունենք։ Սակայն Ադրբեջանից Նախիջեւան ազատ հասանելիություն պետք է լինի։ Այս առումով չպետք է լինեն մաքսատուրքեր, ստուգումներ, սահմանապահության ընթացակարգեր։ Դա մեր օրինական իրավունքն է»,- ասել է Ալիեւը։

Ալիևի խոսքով՝ ինքը Բրյուսելում քննարկել է այս նախագիծը Հայաստանի վարչապետ Նիկոլ Փաշինյանի հետ, սակայն Երևանն արգելափակում է այն։ Հետո Բաքուն սկսեց Իրանից այլընտրանքային ճանապարհ իրականացնել։ Որից հետո հայերը, ինչպես Ալիևն է ասել, սկսեցին բողոքել, իսկ Պետդեպարտամենտի ներկայացուցիչը «տարօրինակ» հայտարարություն արեց ստեղծված իրավիճակի վերաբերյալ։