Լաս Վեգասի համալսարանում պրոֆեսորը կրակ է բացել. կան զոհեր

Լաս Վեգասի Նևադայի համալսարանում (UNLV) հրաձգության հետևանքով՝ զոհվել է երեք մարդ, ևս մեկը ծանր վիրավորվել է։ Մահացել է նաև ենթադրյալ հանցագործը։

Ըստ CNN-ի՝ դեկտեմբերի 6-ին, տեղական ժամանակով՝ ժամը 11:54-ին (Երևանի ժամանակով՝ 23:54-ին), համալսարանի ղեկավարությունը հաստատության կայքում կրակոցների մասին արտակարգ ծանուցում է տեղադրել՝ անվտանգ գոտի տարհանվելու կոչով։ Ժամը 12:37-ին ոստիկանությունը հաղորդում է տվել, որ կասկածյալը մահացել է։ Նրա ինքնությունը պարզվել է, սակայն նրա անունը չի հրապարակվում, քանի դեռ հարազատների հետ աշխատանք չի տարվել։ Իրավապահ մարմինների աղբյուրը CNN-ին հայտնել է, որ նա քոլեջի 67-ամյա պրոֆեսոր է: 

Ոստիկանությունը հայտնել է երեք մահվան մասին։ Վիրավորի վիճակը գնահատվել է ծանր։ Համալսարանը փակ կլինի մինչև շաբաթվա վերջ։

Ինչպես հայտնում է CNN-ը, UNLV-ում տեղի ունեցած ողբերգությունը այս տարվա ընթացքում ԱՄՆ կրթական հաստատություններում 80-րդ դեպքն է։