2023 թվականին գրանցվել է ռեկորդային 183 հակամարտություն. Bloomberg

Արցախ 11 Դեկտեմբեր, 2023 15:16

2023 թվականը 30 տարվա ռեկորդ է սահմանել աշխարհում ակտիվ հակամարտությունների թվով։ Այս տարի գրանցվել է 183 տարածաշրջանային հակամարտություն։ Տարվա ընթացքում զոհերի թիվն աճել է 14%-ով, իսկ բռնության դեպքերը՝ 28%-ով։ Այս մասին գրում է Bloomberg-ը՝ հղում անելով Ռազմավարական հետազոտությունների միջազգային ինստիտուտի (IISS) տվյալներին։

Հետազոտությունը դիտարկել է բացառապես տարածաշրջանային հակամարտությունները, որոնք չեն ներառում այնպիսի գերտերությունների առճակատումները, ինչպիսիք են ԱՄՆ-ն, Ռուսաստանը և Չինաստանը: Միևնույն ժամանակ, IISS-ը նշում է, որ ՀԱՄԱՍ-ի նման խմբերը «աջակցվում են» խոշոր տերությունների կողմից:

«Անլուծելիությունը ժամանակակից գլոբալ հակամարտությունների լանդշաֆտի որոշիչ հատկանիշն է», - նշում են հեղինակները:

Ըստ IISS-ի՝ աշխարհում տարեցտարի ավելանում է հակամարտությունների ինտենսիվությունը։ Հետազոտության հեղինակները կարծում են, որ աշխարհում գերակշռում են «ավելացող անլուծելի հակամարտությունները և զինված բռնությունները աճող թվով դերակատարների, բարդ և հատվող շարժառիթների, գլոբալ ազդեցության և արագացող կլիմայի փոփոխության ֆոնին»:

Հիշեցնենք, որ ՄԱԿ-ի գլխավոր քարտուղար Անտոնիո Գուտերեշն ասել էր, որ ընթացիկ տարին պատմության մեջ ամենաշոգն է, իսկ մարդկությունը կլիմայական փլուզում է ապրում։ Գուտերեշը նախկինում քննադատել էր մարդկությանը կլիմայի փոփոխության դեմ պայքարում առաջընթաց գրանցելու ձախողման համար։ Նրա խոսքով՝ մարդիկ շարժվում են դեպի «վտանգավոր և անկայուն աշխարհ»։