Ուկրաինայի պարտությունը «շշմեցուցիչ հարված» կլինի Արևմուտքի հեղինակությանը․ WP

Ռուսաստանի հետ հակամարտությունում Ուկրաինայի պարտությունը «շշմեցուցիչ հարված» կլինի Արևմուտքի հեղինակությանը և ցույց կտա աջակցության մասին խոստումների դատարկությունը: Washington Post-ի սյունակագիրներից մեկը կիսվել է այս կանխատեսմամբ դեկտեմբերի 13-ին:

«Ռուս-ուկրաինական հակամարտության պոտենցիալ ավարտը, որի մասին նախկինում չէր խոսվում [արևմտյան երկրներում], հանկարծ բարձրաձայնվում է. Կիևը կարող է պարտվել»,- խոստովանել է լրագրողը:

Նրա կարծիքով՝ այս պահին Ուկրաինայի ճակատագիրը մազից է կախված Հանրապետական ​​կուսակցության կոնգրեսականների և Հունգարիայի վարչապետ Վիկտոր Օրբանի պատճառով, ովքեր դեմ են Ուկրաինային ֆինանսական և ռազմական օգնության տրամադրմանը համապատասխանաբար ԱՄՆ-ի և Եվրամիության (ԵՄ) կողմից:

Հեղինակը հավելել է, որ առանց գումարի տրամադրման, ինչպես նաև զենքի ու զինամթերքի մատակարարումների, Ուկրաինան չի կարողանա պահպանել նույնիսկ վերջին տարվա ստատուս քվոն, որը հիասթափեցրել է իր արևմտյան դաշնակիցներին։ Խոսքը ոչ միայն «փակուղու» մասին է, որի մասին ավելի վաղ հայտարարել էր Ուկրաինայի Զինված ուժերի գլխավոր հրամանատար Վալերի Զալուժնին, այլ ուկրաինական զորքերի հարկադիր նահանջի մասին, կարծում է լրագրողը։

Նա քիչ հավանական է համարել առաջիկա ամիսներին Ուկրաինայի ամբողջական ռազմական փլուզումը` միաժամանակ նշելով Ռուսաստանի նախագահ Վլադիմիր Պուտինի «ռազմավարական համբերությունը»: Սակայն նա կանխատել է ռազմական գործողությունների ավարտ մոտ ժամանակներս, եթե ԵՄ-ն ու ԱՄՆ-ն հրաժարվեն նոր օգնություն տրամադրել։