2024-ին ՔՊ-ն լքելու հավանական թեկնածուները

Շաբաթներ առաջ, ելույթ ունենալով ՔՊ վարչության ժողովում, Նիկոլ Փաշինյանը հայտարարել էր, որ այն բոլոր թիմակիցները, ովքեր չեն կիսում ՔՊ գաղափարախոսությունը, ՔՊ ծրագրին հակառակ քայլեր են կատարում, 2024-ից պետք է լքեն կուսակցությունը: Ընթերցողների ուշադրությանն ենք ներկայացնում այս նկարագրության տակ ընկնող Փաշինյանի թիմակիցների տասնյակը և փաստացի այն ՔՊ-ականներին, որոնց գլխին մութ ամպեր են կուտակվել և ովքեր կարող են համարվել ՔՊ-ն լքելու պոտենցիալ թեկնածուներ:

Դիցուք՝ ՔՊ ծրագրում կարող ենք հանդիպել նման դրույթի: Կուսակցությունը որդեգրում է ԼՂ հիմնախնդրի կարգավորման նոր տեսլական: Ըստ այդմ, եթե նախկինում առաջնահերթություն էր դիտարկվում ԼՂ կարգավիճակը, որը պիտի դառնա արցախահայության իրավունքների եւ անվտանգության երաշխիքը, այժմ առաջնահերթություն են դիտվում արցախահայության անվտանգությունն ու իրավունքները, եւ դրանց երաշխիքների համակարգից է բխեցվում անհրաժեշտ կարգավիճակը։ Իսկ այժմ տեսնենք, թե ովքեր են այս դրույթին հակառակ հայտարարություններ արել: Ըստ ՔՊ-ական պատգամավոր Գուրգեն Մելքոնյանի՝ Արցախը Հայաստան չէ և Հայաստանն ընդհանրապես անելիք չունի ԼՂ բնակչության անվտանգության ապահովման գործում:

Մեկ այլ պատգամավոր՝ Հովիկ Աղազարյանին ավելի շատ մտահոգում է Բաքվի հետ անկեղծ լինելը, քան սեփական հայրենակիցների անվտանգության ապահովմանն ուղղված քայլեր կատարելը:

ՔՊ գաղափարախոսության մյուս կարևոր դրույթներից է օրենքի առջև բոլորի հավասարությունը: Տեսնենք, թե Փաշինյանի որ թիմակիցներն են մոռացության մատնել այս կարևոր կետը: Եվ այսպես, օրենքից վեր են ոչ միայն ՔՊ-ականները, այլ նաև նրանց ազգականները: Ի՞նչ պատժի արժանացավ առողջապահության նախկին նախարար Արսեն Թորոսյանն ու իր կինը, ում ԲԿ-ին՝ ՄԻԲՍ-ին, նախարարը պետպատվեր էր իջեցնում՝ փաստացի պաշտոնեական դիրքի չարաշահում կատարելով:

Սյունիքի նախկին մարզպետ Մելիքսեթ Պողոսյանի որդին՝ Կարեն Պողոսյանը, որը մեղադրվում է սպանության փորձ կատարելու համար, ազատ է արձակվել կալանքից: Նրա նկատմամբ որպես խափանման միջոց է ընտրվել ստորագրությունը՝ չհեռանալու մասին։

Երեւան քաղաքի դատարանը մի քանի անգամ ծանուցում է ուղարկել ԱԺ ՔՊ խմբակցության պատգամավոր Սիսակ Գաբրիելյանին ներկայանալու իր գործով դատական նիստերին, սակայն իշխանական պատգամավորը չի ներկայացել եւ պատճառաբանել է, թե ծանուցում չի ստացել: Դատական համակարգը որոշել է Գաբրիելյանին ծանուցում ուղարկել ՀՀ Ազգային ժողովի միջոցով, որպեսզի նա ներկայանա դատարան:

ՔՊ–ի թե՛ գաղափարախոսության, թե՛ ծրագրային կարևոր դրույթներից մեկը կոռուպցիայի դեմ պայքարն է՝ ինչպես կուսակցության շարքերում, այնպես էլ պետության մակարդակով այն բացառելու համար: Մինչդեռ հենց Փաշինյանի թիմակիցներն էլ շարունակում են կոռուպցիոն ռիսկեր առաջացնել իրենց այս կամ այն գործողություններով: Դիցուք՝ Վայոց ձորի մարզի Վայք համայնքի ղեկավար Մխիթար Մաթևոսյանն ընդհանուր 537 միլիոն դրամի պայմանագրեր է կնքել իր կնոջը պատկանող ընկերության հետ, ընդ որում՝ մինչև 2022 թվականն այդ ընկերությունը ղեկավարել է հենց ինքը՝ Մխիթար Մաթևոսյանը, սակայն համայնքի ղեկավար ընտրվելուց հետո ընկերության իր բաժնեմասն ու կառավարումը հանձնել է կնոջը՝ Մերի Մարգարյանին։

Թալին համայնքի ղեկավար Տավրոս Սափեյանն այս տարի երկու պայմանագիր է կնքել իր ընտանիքին պատկանող գազալցակայանի հետ։ Երկու պայմանագրերի հանրագումարը կազմում է 15 մլն 714 000 դրամ: «Սափեյան եղբայրներ» ՍՊԸ-ն այս տարի երեք անգամ մասնակցել է Թալինի համայնքապետարանի համար հեղուկ և սեղմված բնական գազ ձեռք բերելու նպատակով հայտարարված գնումներին, որից երկուսում հաղթող է ճանաչվել։ Ընդ որում, այդ երկու մրցույթների ժամանակ նա միակ հայտատուն է եղել։

Դեռ այն ժամանակ, երբ  Անահիտ Ավանեսյանը զբաղեցնում էր առողջապահության փոխնախարարի պաշտոնը, նրա հետ առնչություն ունեցող դեղագործական ընկերությունը դեղորայք և բժշկական պարագաներ էր վաճառում իր իսկ ենթակայության տակ գտնվող պետական կառույցներին։   «Արմֆարմացիա» ընկերությունը վերջին տարիներին կնքել է 240 պայմանագիր՝ 44 պետական կառույցի հետ, ընդհանուր՝ մոտ 606,7 մլն դրամ արժողությամբ, որի կեսից ավելին՝ 137 պայմանագիրը, արդեն Ավանեսյանի՝ փոխնախարար եղած ժամանակ։ «Արմֆարմացիա»-ն տարիներ շարունակ մենաշնորհային դիրք է ունեցել և մատակարարել է «Մեթադոն» հոգեմետ դեղը:

Իշխող կուսակցության ծրագրում առկա մեկ այլ կարևոր դրույթի էլ անդրադառնանք, այն է՝ ժողովրդավարական արժեքների պահպանումն ու քարոզը: Մինչդեռ հենց Փաշինյանի թիմակիցներն են աչքի ընկել վերը նշված արժեքների դեմ իրենց կազմակերպած արշավներով, հատկապես տուժել են ԶԼՄ-ն ու լրագրողները: Դիցուք ՝ ՔՊ-ական  պատգամավոր Քրիստինե Պողոսյանն ընդհանրապես պատրաստվում էր հարվածել իր աշխատանքային պարտականությունները կատարող լրագրողին՝ նման վարքագիծը համեմելով սպառնալիքներով։

«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը դիմել էր Գլխավոր դատախազություն՝ հայց ներկայացնելով ՔՊ-ական պատգամավոր Վահե Ղալումյանի դեմ՝ ՀՀ քրեական օրենսգրքի 164 հոդվածով՝ առերևույթ լրագրողների մասնագիտական պարտականությունների կատարմանը խոչընդոտելու դրվագով։ Սակայն քրեական գործ չէր հարուցվել:

Ինչպես տեսնում ենք, ՔՊ-ն լքելու պոտենցիալ թեկնածուները քիչ չեն և նրանք բոլորն էլ կուսակցության կարկառուն դեմքերից են: Կամ Փաշինյանը իրապես չի նկատել իր թիմակիցների՝ կուսակցության ծրագրից և գաղափարախոսությունից շեղվելու հանգամանքը, կամ էլ 2024-ին մեզ ՔՊ–ի իրական ռեբրենդինգ է սպասվում...