Հեղափոխական պաշտոնյաների աշխատանքի ՕԳԳ-ն. Դավիթ Սարգսյան

Շարունակելով ներկայացնել հեղափոխական պաշտոնյաների աշխատանքի արդյունավետությունը՝ այսօր կանդրադառնանք Դիլիջանի համայնքապետ Դավիթ Սարգսյանին:

Դիլիջանի համայնքապետարանի ինտերնետային կայքն ամիսներ առաջ հայտնում էր, որ քաղաքի Ուսանողական փողոցում կատարվում է վերանորոգում, գրունտային հողի հարթեցում եւ խճապատում։ Զբոսաշրջային Դիլիջանի բնակիչները, սակայն, դժգոհում են քաղաքի տարբեր փողոցների անբարեկարգ վիճակից, ճանապարհների մեծ փոսերից, քաղաքի կենտրոնում, գերեզմանատներում թափառող կովերից, անտեր, ագրեսիվ շներից, քաղաքի փողոցներում լցված աղբից։ Տուրիստական սեզոնն է, շատ զբոսաշրջիկներ, այդ թվում՝ արտերկրից ժամանածներ, զարմանում են Դիլիջանում տիրող անտերությունից։

Ամիսներ առաջ մամուլում հայտնվել էր մի տեղեկություն, համաձայն որի՝ Դիլիջանի համայքնապետը համայնքի հողերը օտարում է Երևանի բնակիչներին: Նշենք, որ այս տեղեկությունը Դավիթ Սարգսյանն անգամ չի էլ փորձել հերքել, ինչը, մեղմ ասած, զարմանալի է:

Մամուլը նաև  ահազանգում է, որ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում ընդունել է քաղաքացի Սուրեն Մանուկյանին աճուրդային կարգով հողամաս օտարելու մասին։ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս, Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: 

Սակայն, օբյեկտիվ լինելու համար, նշենք նաև, որ Դիլիջանի համայնքապետն աչքի է ընկել նաև մի շարք դրական քայլերով: Դիցուք՝ Դիլիջանի համայնքապետարանի կողմից բարեկարգվում է Հովք գյուղական բնակավայրի` սարատեղի բարձրացող ճանապարհը: Բացի այդ, բարեկարգվում է Գոշ գյուղական բնակավայրի` սարատեղի բարձրացող ճանապարհը: Հունիսի 26-ից Դիլիջանի համայնքապետարանի աշխատակազմի առաջատար մասնագետներ Հայկ Սարգսյանը և Վարդան Մկրտչյանը գտնվում են ՌԴ Կրասնոյարսկի երկրամասում՝ մասնակցելու Երիտասարդական նախաձեռնության «Բիրյուսա 2023» կրթական ֆորումին: