ԱՄՆ Կոնգրեսը որոշել է գաղտնազերծել ՉԹՕ-ների մասին տեղեկությունները

ԱՄՆ Կոնգրեսը հավանություն է տվել օրինագծին, որը թույլ կտա գաղտնազերծել ՉԹՕ-ների մասին տեղեկությունը։ Այս մասին հայտնում է The New York Times-ը։

Օրենքն ուժի մեջ կմտնի ԱՄՆ նախագահ Ջո Բայդենի կողմից ստորագրվելուց հետո։ Ըստ դրա՝ կհրապարակվեն պետական ​​փաստաթղթերը, որոնք վերաբերում են այսպես կոչված՝ չբացահայտված անոմալ երևույթներին, անհայտ ծագման տեխնոլոգիաներին և ոչ մարդկային բանականությանը: Փաստաթղթերը պետք է հրապարակվեն ստեղծման պահից 25 տարվա ընթացքում:

Կոնգրեսի կողմից ընդունված օրինագծի վերջնական տարբերակում ավելացվել է կետ, որը թույլ է տալիս թաքցնել տեղեկությունը, եթե նախագահը որոշի, որ այն վտանգ է ներկայացնում ազգային անվտանգության համար: Օրինագծի հեղինակներից մեկը՝ ԱՄՆ Սենատի դեմոկրատական ​​մեծամասնության առաջնորդ Չակ Շումերը կարծում է, որ դրանից կօգտվեն հենց այն կազմակերպությունները, որոնք նախկինում կանխել են անոմալ երեւույթների մասին տեղեկության գաղտնազերծումը։

«Սա նշանակում է, որ չբացահայտված անոմալ երևույթների մասին տեղեկությունը գաղտնազերծելու որոշումը կայացվելու է հիմնականում այն ​​նույն կազմակերպությունների կողմից, որոնք տասնամյակներ շարունակ թաքցրել են դրանք և կանխել դրանց գաղտնազերծումը»,– ասել է Շումերը։