Հեղափոխական պաշտոնյաների աշխատանքի ՕԳԳ-ն. Կառլեն Մկրտչյան

Շարունակելով ներկայացնել հեղափոխական պաշտոնյաների աշխատանքի արդյունավետությունը՝ այսօր կանդրադառնանք Արտաշատի համայնքապետ Կառլեն Մկրտչյանին:

ԶԼՄ-ից «Իրավունք»-ը գրել էր, որ Արտաշատ խոշորացված համայնքի ՔՊ-ով առաջադրված եւ ընտրված համայնքապետ Կառլեն Մկրտչյանը, ով մինչ ավագանու ընտրությունները արտաշատցիների շրջանում ուներ «մեր տղա» համբավը, բազմելով համայնքապետի աթոռին, ստանձնելով 39 համայնքի մլրդ. դրամի հասնող բյուջեի ղեկավարությունը, ըստ նշված լրատվամիջոցի աղբյուրի, դարձել է ինքնահավան, որոշումներ է կայացնում միայն իր ու մերձավորների շահերից ելնելով: Իսկ ավագանու նիստերից մեկի ժամանակ վերջինս սահմանափակել է ՀԿ-ների ղեկավարների մուտքը եւ զրկել ձայնի իրավունքից, ավելին, մեղմ ասած, վռնդել է դուրս, ինչը բարձրաձայնել է նաեւ ՀԿ-ի ղեկավարներից մեկը։

Ուշագրավ է Արտաշատի համայնքապետարանի այս տարվա գնումները: Կենցաղային աղբի հավաքման ծառայություն է գնվել մի ՍՊԸ-ից, որը հարկայինի կողմից տուգանքի է ենթարկվել:

Ոչ պակաս հետաքրքիր է համայնքապետարանի գնումների պլանը: 20000000 դրամով ձեռք է բերվելու կամ արդեն իսկ ձեռք է բերվել Սեդան թափքով ավտոմեքենա: Փոխադրամիջոցների հետ կապված ապահովագրական ծառայությունների համար հատկացվել է 783000 դրամ: Ուղևորափոխադրող ավտոմեքենաների վարձակալության  վրա` վարորդի հետ միասին, 500 000 դրամ: 849 հազար դրամ է հատկացվելու դրոշների ձեռք բերմանը: 9000,0 դրամ՝ սգո ծառայություններ գնելուն: 70000 դրամի զուգարանի խոզանակ, 200000 դրամի զուգարանի թուղթ, 265000 դրամի աղբարկղ, 550000 և 200000 դրամի օդորակիչ, 320000 և 1250000 դրամի համակարգիչ, 980000 դրամի մուտքը կասեցնող սարք, 985 հազար դրամի աթոռ և բազկաթոռ, 1200000 դրամի էլ անշարժ գույք՝ հող է ձեռք բերվելու:

Մկրտչյանի  բուռն գործունեությանն անդրադառնալիս հարկ է հայացք գցել համայնքապետարանի պաշտոնական կայքում տեղ գտած հիմնական նորություններին, այն է՝ կայացած նարդու առաջնություն, համայնքապետի շնորհավորական խոսքեր, գեղարվեստի դպրոցի հաշվետու ցուցահանդես, համապետական շաբաթօրյակ, ծառատունկ: Քիչ թե շատ լուրջ աշխատանքներից կարելի է առանձնացնել միայն սուբվենցիոն ծրագրերի շրջանակում համայնքների մի շարք ճանապարհների ասֆալտապատումը: Չկան հեղափոխական, նորարարական պրոյեկտներ, չկա ոչ մի խոսք ներդրումային ծրագրերի մասին: 

Միևնույն ժամանակ օբյեկտիվ լինելով՝ նշենք, որ Արտաշատի համայնքապետարանն աչքի է ընկել նաև դրական քայլերով: Դիցուք՝  Արտաշատ համայնքի 2023 թվականի հունվար-նոյեմբեր ամիսների սեփական եկամուտների հավաքագրման ցուցանիշը՝ գույքային հարկերի, գույքի վարձակալության և աղբահանության մատուցման վճարովի ծառայության մասով, կազմել է 1,135,330,800 դրամ, ինչը նախորդ տարվա նույն ժամանակահատվածի ցուցանիշից ավելի է 330,778,400 դրամով կամ 41,1%-ով: Տեղական տուրքերի մասով հունվար-նոյեմբեր ամիսների հավաքագրման ցուցանիշը կազմել է 55,270,300 դրամ, որը նախորդ տարվա նույն ժամանակահատվածի ցուցանիշից ավելի է 14,330,200 դրամով կամ 35%-ով: