Ահա թե ինչի ենք պատրաստ, եթե ԱՄՆ-ն սխալ որոշում կայացնի Փհենյանի դեմ. Կիմ Չեն Ըն

Հյուսիսային Կորեայի առաջնորդ Կիմ Չեն Ընը հայտարարել է, որ Hwasong-18 միջմայրցամաքային բալիստիկ հրթիռի հաջող արձակումը ցույց է տվել, թե ինչ է պատրաստ Հյուսիսային Կորեան, եթե ԱՄՆ-ն «սխալ որոշում կայացնի» Փհենյանի դեմ: Նրա խոսքերը հայտնում է Կորեայի կենտրոնական լրատվական գործակալությունը:

«Մենք հստակ ազդանշան ենք ուղարկել թշնամական ուժերին, որոնք, չնայած մեր բազմիցս խիստ նախազգուշացումներին և դատապարտումներին, ընդլայնում են ռազմական առճակատման հիստերիան, որը շարունակվել է ամբողջ տարվա ընթացքում», - ասել է Կիմ Չեն Ընը:

Նա ընդգծել է, որ զորավարժությունները հստակ ցույց են տվել, թե ինչ անհապաղ գործողությունների է պատրաստ ԿԺԴՀ-ն։ Ըստ Կիմ Չեն Ընի՝ Վաշինգտոնի կողմից հետագա թշնամական գործողությունների դեպքում Փհենյանը պետք է պատասխանի «ավելի ակտիվ հարձակողական գործողություններով»՝ օգտագործելով «ավելի առաջադեմ և սպառնալից տարբերակներ»:

Ինչպես հայտնել ենք, երեկ՝ դեկտեմբերի 18-ին, ԿԺԴՀ-ն միջմայրցամաքային բալիստիկ հրթիռ է արձակել դեպի Ճապոնական ծով։ Ճապոնիայի պաշտպանության նախարարությունը հայտնել է, որ Հյուսիսային Կորեայի կողմից արձակված հրթիռն ընկել է Ճապոնիայի բացառիկ տնտեսական գոտուց դուրս։