Սոթքի հանքավայրում փակ եղանակով արդյունահանման մեկնարկը կտրվի 2024–ի մարտին. 300 աշխատակից կրճատվել է. փոխնախարար

Սոթքի ոսկու հանքավայրում փակ (ստորգետնյա) եղանակով արդյունահանման մեկնարկը կտրվի 2024–ի մարտին։ Այս մասին, այսօր՝ դեկտեմբերի 19-ին, լրագրողների հետ զրույցում հայտնեց Տարածքային կառավարման և ենթակառուցվածքների փոխնախարար Հովհաննես Հարությունյանը։

«Մարտին արդեն կսկսեն մեծ ծավալով հանքաքար արդյունահանել։ Մինչև աշուն պլանավորվում է, որ Արարատի ոսկու կորզման ֆաբրիկան նույնպես կվերագործարկվի և կսկսի աշխատել»,– ասաց նա:

Իսկ մինչ այդ, նրա խոսքով, հանքարդյունահանման փակ եղանակի անցնելու համար նախ պետք է իրականացվեն նախապատրաստական աշխատանքներ։

«Պետք է, կոպիտ ասած, փորել, հասնել հանքաքարին։ Դրա համար ժամանակ է պետք։ Երբ որ կհասնեն այդ պրոցեսին և ամբողջ հզորությամբ կկարողանան աշխատել, հանքը նորմալ, բնականոն կսկսի աշխատել»,– ասաց Հարությունյանը։

Հանքավայրի շահագործման եղանակի փոփոխությունը, սակայն, բացի տնտեսական խնդիրներից, նաև սոցիալական խնդիրներ է առաջ բերել։ Հարությունյանի ներկայացրած տվյալներով` Սոթքի հանքավայրի շուրջ 300 աշխատակիցներ այս պահի դրությամբ արդեն կրճատվել են։

«Կազմակերպության հետ կար պայմանավորվածություն, որ դա պետք է աստիճանաբար լիներ։ Նախ, այն մարդիկ, որոնք պետք է անցնեին թոշակի, նրանց փոխարեն նոր մարդիկ չեն ընդունվել։ Այսինքն` դինամիկ այնպես է արվել, որ թե՛ աշխատողների համար շատ ցավոտ չլինի, և թե՛ կազմակերպության համար։ Խնդիր ենք դրել, որ այն աշխատողները, որոնք փակ հանքում աշխատանք չեն ունենա, կկարողանան տեղափոխվել սեփականատիրոջ այլ կազմակերպություններ, օրինակ` Ագարակ»,– ասաց Հարությունյանը։

Նշենք, որ ապրիլի 14-ից սկսած ադրբեջանական զինուժի կողմից պարբերաբար կրակահերթեր են իրականացվում Սոթքի հանքավայրի ուղղությամբ։ Հանքշահագործող «ԳեոՊրոմայնինգ» ընկերությունը մայիսի 30-ին պաշտոնապես հայտարարեց Ադրբեջանի պարբերական հրետակոծությունների պատճառով Սոթքի հանքավայրում բաց հանքի աշխատանքը դադարեցնելու որոշման մասին։