Միմյանցից բեխաբար նախարարները...

Այսպես, կառավարության նիստից հետո լրագրողների հետ զրույցում ԲՏԱ նախարար Ռոբերտ Խաչատրյանին ուշագրավ անակնկալ էր սպասվում, պարզվում է` նա դեռ ծանոթ չէ իր թիմակից Վահան Քերոբյանի կողմից այդքան գովազդված  «Սեպուհ 1» ավտոմեքենաների արտադրության գործընթացին: Հակառակ դեպքում` ԲՏԱ նախարարն այդչափ անկեղծ չէր զարմանա՝ լսելով լրագրողների հարցը:

Իհարկե, Վահան Քերոբյանն այս դեպքում նեղանալու տեղ ունի: Ի վերջո, նա ամառվանից ամեն քայլափոխի խոսում է հայկական արտադրության մեքենաների մասին, անխնա գովազդում  իր նոու-հաուն, անգամ միջազգային գործընկերներին է հասցրել ներկայացրել պրոյեկտը որպես կառավարության մեգա նախագիծ, իսկ Ռոբերտ Խաչատրյանը ոչ ավել, ոչ պակաս տեղյալ չէ, թե ինչ է նշանակում «Սեպուհ 1»: Չնայած, թվում էր՝ տրամաբանական կլիներ, որ ԲՏԱ նախարարն ամենատեղեկացվածը լիներ տվյալ դեպքում՝ հաշվի առնելով, որ գործ ունենք նորագույն տեխնոլոգիաների հետ:

Հանուն արդարության՝ նշենք, որ Վահան Քերոբյանն էլ առանձնապես տեղյակ չէ այլ գերատեսչությունների աշխատանքներից, նա անգամ իր գերատեսչության թվերին լիարժեքորեն չի տիրապետում: Օրինակ, շաբաթներ առաջ նա հայտարարել էր, որ չի կարող ասել, թե անցնող տարում ՀՀ տնտեսության մեջ օտարերկրյա ներդրումները քանի միլիարդ դոլար են կազմել:  Ստացվում է՝ նախարարներից մեկն իր ոլորտից տեղյակ չէ, մյուսն էլ՝ գործընկերոջ կողմից ամիսներ շարունակ անոնսված մեգա նախագծերից: Այսպես էլ աշխատում են ու այսպես էլ մեգա նախագծեր են կյանքի կոչում: Ակնհայտ է, որ Հայաստանի պետական կառավարման համակարգում,  ինչպես են ասում են ժողովրդական լեզվով՝ շունը տիրոջը չի ճանաչում...