«Չորրորդ ինքնիշխանություն». Տարբեր քաշային կատեգորիաներ

Թերթը գրում է. «Մամուլի հրապարակումների համաձայն, դեկտեմբերի 19-ին Մոսկվայի Կրեմլի մեծ պալատում, ԱՊՀ 20-ամյակի առթիվ հրավիրված ընդունելության ժամանակ Սերժ Սարգսյանն ու Իլհամ Ալիևը վիճել են իրար հետ ու նույնիսկ քաշքշել միմյանց:

«ՉԻ»- Իլհամ Ալիևն, իհարկե, պաթոլոգիկ ապուշ է, և եթե իսկապես Մոսկվայում նման միջադեպ է տեղի ունեցել, ապա դա այն եզակի դեպքերից է, երբ հայ ժողովուրդը պիտի միաձայն վանկարկի «Առա՛ջ, Հայաստան»: Այլ հարց է, որ հաշվի առնելով հակամարտող կողմերի ֆիզիոլոգիական առանձնահատկությունները՝ Սերժ Սարգսյանը ճիշտ կանի, եթե հաջորդ անգամ Մոսկվա գնալիս իր հետ տանի նաև Վովա Գասպարյանին: Թող առիթից օգտվի և Ալիևի գրպանը բան-ման գցի: Հեչ որ չլինի՝ «դոպինգ-կոնտրոլով» Ալիևին կորակազրկեն:

Բայց իրականում սա շատ ավելի լուրջ միջադեպ է, և հայ հասարակությունը մտածելու բան ունի: Պետք է պարզել, եթե ղարաբաղյան բանակցություններն իսկապես այդ մակարդակով են ընթանում, ապա պետք է մի կողմ դնել ներքաղաքական տարաձայնությունները և նախագահ ընտրել Գագիկ Ծառուկյանին: Այդ դեպքում, հավատացնում ենք, հակամարտությունը կկարգավորվի առավելագույնը մի 15-20 վայրկյանում՝ «տեխնիկական նոկաուտ» ձևակերպմամբ: ՀՀ որևէ քաղաքացի, հավաստացնում ենք, դեմ չի լինի այս տարբերակին»: