ՔՊ-ականների միջև հաճախակի կոնֆլիկտները՝ «խորտակվող նավի» նախանշան

Վերջին շրջանում բավական հաճախ է խոսվում այն մասին, որ ՔՊ-ական այս կամ այն պաշտոնյաների միջև լուրջ լարվածություն է առաջացել և ամենօրյա գզվռտոցը հեղափոխականների միջև սովորական երկույթ է դարձել: Գաղտնիք չէ, որ նման դրվագները, այն է՝ թիմակիցների միջև գզվռտոցը, սովորաբար խորտակվող նավի նախանշան են և նախորդում են դրան: Բերենք մի քանի օրինակներ, որոնք ասվածի վառ վկայությունն են հանդիսանում:

Օրինակ՝ ամիսներ առաջ Սյունիք Փաշինյանի այցին ընդառաջ լուրջ ներթիմային բախումներ էին տեղի ունենում երեք պատգամավորների միջև՝ Նարեկ Ղահրամանյանի, Դավիթ Դանիելյանի և Արմեն Խաչատրյանի: Նրանցից յուրաքանչյուրը փորձում էր մարզում ամրապնդել իր դիրքերը, որպեսզի Փաշինյանի աչքում դիվիդենտներ շահի և ամրապնդի մարզում իր դիրքերը: Հարթ չեն  առողջապահության ներկա և նախկին նախարարների՝ Անահիտ Ավանեսյանի և Արսեն Թորոսյանի հարաբերությունները: Թորոսյանը չի էլ թաքցնում իր ամբիցիաները և կուսակցի ոտքի տակ փորելու փորձերը: Պատգամավոր Բաբկեն Թունյանի և էկոնոմիկայի նախարար Վահան Քերոբյանի յուրաքանչյուր հանդիպում մենամարտի է նմանվում: ՔՊ խմբակցության նախկին ղեկավար Հայկ Կոնջորյանի հետ էլ մի խումբ ՔՊ-ականների հարաբերությունները երկար ժամանակ լարված էին, նրան ՔՊ-ում չեն վստահում, քանի որ, ժամանակին դավաճանեց «Լուսավոր Հայաստան» կուսակցությանը եւ շտապեց ՔՊ ցուցակով պատգամավոր դառնալ: ՔՊ-ում որոշակի անվստահություն կա նաև Երևանի քաղաքապետ Տիգրան Ավինյանի հանդեպ: Մինչ Երևանի ավագանու ընտրությունները շատերը ՔՊ-ում կարծում էին, որ նրա վարկանիշը բավարար չէր ընտրություններում հաղթանակ տանելու համար, բացի այդ շատերին էլ վրդովվեցնում է Ավինյանի՝ ՔՊ-ից դիստանցիա պահելու վարքագիծը, որը վերջինս դրսևորում է արդեն բավական երկար ժամանակ:

Նմանատիպ օրինակները բազմաթիվ են և շարքը կարելի է անվերջ շարունակել: Ինչպես տեսնում ենք՝ հեղափոխական թիմում ՔՊ-ականների ջրերը բնավ էլ մեկ առվով չեն հոսում և հեղափոխությունից հետո եղած միասնականության մթնոլորտը, որի մասին այդքան խոսում էր վարչապետ Նիկոլ Փաշինյանը, հօդս է ցնդել: Պատահական չէ, որ վերջին շրջանում Նիկոլ Փաշինյանը գրեթե յուրաքանչյուր շաբաթ հանդիպումներ է անցկացնում կուսակցության վարչության անդամների և մարզային ակտիվի հետ` փորձելով վերջիններիս համոզել, որ վերահսկում է իրավիճակը և չի պատրաստվում հանձնել իշխանությունը` այսպիսով վստահություն ներշնչելով վաղվա օրվա հանդեպ: Փաշինյանը քաջ գիտակցում է, որ վերջին շրջանում թիմում ձևավորված, մեղմ ասած, անառողջ մթնոլորտը, գզվրտոցը, միմյանց տակ փորելու անթաքույց փորձերը գալիս են առաջին հերթին՝ ՔՊ-ի և սեփական քաղաքական ապագայի հանդեպ կուսակիցների ունեցած անվստահությունից և վախերից: Եվ, ինչ խոսք, չի կարելի ասել, որ ՔՊ-ականները նման վախերի հիմքեր չունեն: Ի վերջո, Փաշինյանը գուցե և Արևմուտքի օգնությամբ ստանա իր անձնական անվտանգության երաշխիքները, սակայն թիմակիցներն, ինչպես ասում են, մնալու են խորտակվող նավի նավեզրում ....