Անցնող շաբաթվա ամենակարևոր լուրերի ընտրանին

Ձեր ուշադրությանն ենք ներկայացնում անցնող շաբաթվա ամենակարևոր լուրերի ընտրանին։ Եվ այսպես՝

Դեկտեմբերի 25

 Նիկոլ Փաշինյանը ելույթ ունենալով Եվրասիական բարձրագույն խորհրդի նիստում հայտարարել է, որ ԵԱՏՄ ստեղծման մասին համաձայնագիրը հիմնված է այն հիմնարար պոստուլատի վրա, որ ԵԱՏՄ-ն տնտեսական ասոցիացիա է, որը չպետք է ունենա քաղաքական, առավել եւս՝ աշխարհաքաղաքական օրակարգ։

ՀՀ ԱԳՆ-ն տեղեկացրել է, որ Երևանը ստացել է խաղաղության պայմանագրի տեքստի շուրջ Բաքվի առաջարկները: 

ՀՀ էկոնոմիկայի նախարարությունը ներկայացրել է ուշագրավ մակրոտնտեսական օպերատիվ ցուցանիշներ: Ըստ դրանց, 2023թ․ հունվար-նոյեմբերին 2022թ հունվար-նոյեմբերի համեմատությամբ. Տնտեսական ակտիվության ցուցանիշը կազմել է 9.4%, Արդյունաբերության թողարկման ծավալն աճել է 2.1%–ով

Դեկտեմբերի 26

Կարմիր խաչի միջազգային կոմիտեի (ԿԽՄԿ) ներկայացուցիչները Բաքվում կալանավորված Արցախի նախկին ղեկավարներին են հանձնել հարազատների կողմից ուղարկված ծանրոցները: Այս մասին ադրբեջանական լրատվամիջոցների հետ զրույցում ասել է Ադրբեջանի խոշտանգումների դեմ կոմիտեի փոխնախագահ Էլչին Շիրինովը:

Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Սանկտ Պետերբուրգում քննարկել են Հայաստան-Ադրբեջան խաղաղության օրակարգին վերաբերող հարցեր։

Դեկտեմբերի 27

Աշխատանքային այցով Հայաստան է ժամանել Իրանի արտաքին գործերի նախարար Հոսեյն Ամիր Աբդոլլահիանը: Տեղի է ունեցել  Հայաստանի և Իրանի ԱԳ նախարարների հանդիպումը, որին հետևել է Արարատ Միրզոյանի և Հոսեյն Ամիր Աբդոլլահիանի համատեղ մամուլի ասուլիսը:

Ազգային ժողովի նախագահ Ալեն Սիմոնյանը չի բացառել, որ Երևանի համար կարող է ընդունելի լինել Հայաստանի և Ադրբեջանի միջև սահմանները խաղաղության համաձայնագրից առանձին որոշելու՝ Բաքվի առաջարկը։

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր հանդես է եկել տարեվերջյան մամուլի ասուլիսով՝ ամփոփելով 2023 թվականին նախարարության համակարգման ոլորտներում իրականացված աշխատանքները: ԿԳՄՍ նախարարն անցնող տարում իրականացված աշխատանքներից կարևորել է հատկապես առանձին ոլորտների ռազմավարությունների հաստատումն ու հայեցակարգային աշխատանքները:

Դեկտեմբերի 28

Ֆինանսների նախարար Վահե Հովհաննիսյանը հայտարարել է, որ 2024 թվականից եկամուտների հայտարարագիր պետք է ներկայացնեն աշխատանքային պայմանագիր ունեցող բոլոր անձինք, դա նշանակում է, որ 2024-ի համար հայտարարագիրը ներկայացնելու են 2025 թվականին:

ՀՀ ԱԽ քարտուղար Արմեն Գրիգորյանը հանդիպել է Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանի հետ: Զրուցակիցները գոհունակությամբ ընդգծել են երկու բարեկամ երկրների միջև փոխադարձ հարգանքի և երկու ժողովուրդների հազարամյա եղբայրության վրա ձևավորված բարձր մակարդակի քաղաքական երկխոսության շարունակականության կարևորությունը:

Դեկտեմբերի 29

Հայաստանի ֆուտբոլի ֆեդերացիան ամփոփել է Հայաստանի 2023 թ. լավագույն ֆուտբոլիստի քվեարկության արդյունքները։ Տարվա լավագույն ֆուտբոլիստ է ճանաչվել Ինտերի կիսապաշտպան Հենրիխ Մխիթարյանը:

Բարձր տեխնոլոգիական արդյունաբերության նախարար Ռոբերտ Խաչատրյանն ազատվել է զբաղեցրած պաշտոնից։ Նախարարի պաշտոնում նշանակվել է Մխիթար Հայրապետյանը, ով հեղափոխությունից հետո զբաղեցրել է Սփյուռքի նախարարի պաշտոնը:

Դեկտեմբերի 30

ՆԱՏՕ-ի գլխավոր քարտուղարի քաղաքական հարցերով օգնականի տեղակալ, Կովկասում եւ Կենտրոնական Ասիայում Դաշինքի հատուկ ներկայացուցիչ Խավիեր Կոլոմինան հայտարարել է, որ ՆԱՏՕ-ն աջակցում է Հայաստանի և Ադրբեջանի միջև հարաբերությունների կարգավորմանն ուղղված ջանքերին

ՀՀ էկոնոմիկայի նախարարության նախաձեռնությամբ տեղի է ունեցել «Հայաստանի Հանրապետությունում անասնաբուծության ճյուղում իրականացվող ներդրումային ծրագրերին աջակցության տրամադրման փորձնական ծրագրի» մեկնարը ազդարարող պայմանագրերի ստորագրման արարողությունը։