Ավստրալացի սենատորը եկել էր մոտիկից ծանոթանալու Հայոց ցեղասպանության և Արցախյան խնդիրներին

Դեկտեմբերի 26-ին ԼՂՀ Ազգային ժողովի նախագահ Աշոտ Ղուլյանն ընդունել է Ավստրալիայի Նոր Հարավային Ուելս նահանգի խորհրդարանի վերին պալատի՝ սենատի անդամ Վոլթ Սեքորդին, այս մասին հայտնում են ԼՂՀ ԱԺ մամլո ծառայությունից։

Հայտնելով, որ Ավստրալիա-Հայաստան բարեկամության խորհրդարանական խմբի անդամ է, ավստրալացի սենատորը նշեց, որ Արցախ է ժամանել ճանաչողական այցով։ «Բարեկամության մեր խմբի կազմում իմ այցը Երևան, ապա և Ստեփանակերտ բացատրվում է հիմնականում երեք պատճառով, ասաց նա. նախ, տեսնել Հայաստանը, ապա՝ ավելի մոտիկից ծանոթանալ Օսմանյան Թուրքիայում 1915թ. իրագործված Հայոց ցեղասպանության խնդրին, որի մասին որոշակի տեղեկություններ ունեմ և հետո՝ անձամբ տեսնել ու ճանաչել Արցախը»։ Խորհրդարանականի հաղորդմամբ՝ վերջին առումով իրեն խնդրել են ավստրալահայ համայնքի անդամները, որոնց հետ ինքը սերտ շփումներ ունի։ Մեր նահանգն Ավստրալիայում առաջինն է ճանաչել Հայոց ցեղասպանությունը՝ անթաքույց հպարտությամբ նշեց Վոլթ Սեքորդը։

Ողջունելով հյուրին, ԱԺ նախագահը գոհունակություն հայտնեց նրա այցի կապակցությամբ։ «Ավստրալիան այն երկրների շարքում է, որտեղից մենք մշտապես բարեկամական վերաբերմունք ենք զգում և ակնկալում»,– ասաց նա։

Զրույցի ընթացքում խորհրդարանի նախագահը սենատորի խնդրանքով ներկայացրեց ղարաբաղա-ադրբեջանական հակամարտության կարգավորման գործընթացի զարգացումները, այդ համատեքստում կողմերի դիրքորոշումները, հիմնախնդրի արդարացի լուծման վերաբերյալ արցախահայության ակնկալիքները։

Հանդիպմանը ներկա էր նաև ՀՅԴ Արցախի կենտկոմի ներկայացուցիչ Դավիթ Իշխանյանը։