Որ երկրներ կայցելի Պուտինը 2024 թվականին. ՏԱՍՍ

ՌԴ նախագահ Վլադիմիր Պուտինը 2024 թվականին կարող է մի քանի արտասահմանյան այցեր կատարել։ Կրեմլը դեռ չի հայտնել, թե ուր է մեկնելու Պուտինը, մանավանդ որ մայիսին ավարտվում է նախագահի պաշտոնում նրա ներկայիս ժամկետը, գրում է ՏԱՍՍ–ը։

Ինքը՝ Ռուսաստանի ղեկավարը, խոսել է մոտ ապագայում բարեկամ երկրներ հնարավոր այցերի մասին. «Չեմ բացառում, բայց առայժմ աշխատում եմ ոչինչ չծրագրել»։ 

Նախորդ ամիսներին Պուտինը հրավերներ էր ստացել՝ այցելելու Բրազիլիա, Բուրունդի, Վիետնամ, Իրաք, Իրան, Հյուսիսային Կորեա, Կուբա, Մոնղոլիա, Թաիլանդ, Թուրքիա, Հասարակածային Գվինեա և այլ երկրներ։

Ռուսաստանի Դաշնության նախագահին ավանդաբար սպասում են հետխորհրդային տարածքի պետություններում, այդ թվում՝ Աբխազիայում և Հարավային Օսիայում, Բելառուսում, Տաջիկստանում և Ուզբեկստանում։ Պուտինը հնարավոր է համարել իր այցելությունը Հայաստան՝ չնայած բոլոր դժվարություններին։ Երևանը նախագահում է Եվրասիական տնտեսական միությունը (ԵԱՏՄ) 2024 թվականին, սակայն «հնգյակի» առաջնորդների որոշմամբ ասոցիացիայի տասներորդ հոբելյանական գագաթնաժողովը տեղի կունենա մայիսին Մոսկվայում։

G20–ը կանցկացվի նոյեմբերին Բրազիլիայում: ՌԴ նախագահի մամուլի քարտուղար Դմիտրի Պեսկովը նշել է, որ առաջնորդների այս հանդիպմանը Պուտինի մասնակցության ձևաչափի հարցը (եթե նա վերընտրվի պաշտոնավարման նոր ժամկետով) դեռևս լուծված չէ։ Միևնույն ժամանակ, Բրազիլիայի նախագահն ասել է, որ կհրավիրի Պուտինին՝ չնայած հանրապետության կողմից Միջազգային քրեական դատարանի իրավասության ճանաչմանը։

Ինչ վերաբերում է ոչ բարեկամ երկրներին, ապա վերջին անգամ Պուտինն այս երկրներից մեկն այցելել է 2,5 տարի առաջ՝ Շվեյցարիա 2021 թվականի հունիսին՝ հանդիպելու ԱՄՆ նախագահ Ջո Բայդենի հետ։