Հարավային Կորեայում նախագահի գրասենյակ ներխուժելու փորձի համար 20 ուսանող է ձերբակալվել

Հարավային Կորեայի ոստիկանությունը ձերբակալել է 20 ուսանող ակտիվիստի, ովքեր փորձել են առանց թույլտվության մտնել Սեուլի նախագահական վարչակազմի համալիր։ Այս մասին հայտնում է Yonhap գործակալությունը։

Ձերբակալվածները Կորեայի համալսարանների առաջադեմ միության անդամներ են։ Ոստիկանության տվյալներով՝ նրանք փորձել են մուտք գործել Յոնսանի տարածքում գտնվող համալիր դարպասով և ցանկապատով։ Մինչ այս՝ նրանք բողոքի ակցիա են անցկացրել՝ պահանջելով հատուկ հետաքննություն կազմակերպել առաջին տիկնոջ նկատմամբ՝ արժեթղթերի մանիպուլյացիայի կասկածանքով, և պահանջել են հանդիպում վարչակազմի պաշտոնյաների հետ։

Ոստիկանությունը նախատեսում է պարզել ակտիվիստների մտադրությունները։

Հարավային Կորեայի խորհրդարանը, որտեղ ընդդիմությունը վերահսկում է մեծամասնությունը, նախկինում օրինագիծ էր ընդունել նախագահի կնոջ նկատմամբ հետաքննություն անցկացնելու մասին, սակայն պետության ղեկավարը վետո է դրել դրա վրա։