Սիրիայում ամերիկյան ռազմաբազան հրթիռակոծության է ենթարկվել

Սիրիայի Դեյր էզ Զոր նահանգում տեղակայված ամերիկյան ռազմաբազան հրթիռային հարձակման է ենթարկվել։ Այս մասին հայտնում է Al Mayadeen հեռուստաալիքը։

«Հրթիռային հարձակումն իրականացվել է Դեյր-էզ-Զորից արևելք գտնվող Ալ-Օմար նավթային հանքավայրի ամերիկյան բազայի վրա»,- ասվում է հեռուստաալիքի հաղորդագրության մեջ։

Հեռարձակողը նշել է, որ բազայի վրա արձակվել է 30 հրթիռ, արձակումը տեղի է ունեցել Սիրիայի տարածքից։

Նշվում է, որ, ընդհանուր առմամբ, ԱՄՆ-ն ունի 24 ռազմակայան և 4 կետ Սիրիայի Արաբական Հանրապետության տարածքում։ Պաղեստինաիսրայելական հակամարտության սրման սկզբից երկրում ամերիկյան բազաները պարբերաբար կրակի տակ են հայտնվել։

Հունվարի 4-ին «Իրաքի իսլամական դիմադրություն» շիա զինյալ կազմակերպության ներկայացուցիչները հայտարարեցին Սիրիայի Թանֆում ամերիկյան բազայի վրա հարձակման մասին։

Մինչ այս, Սիրիայի հյուսիս-արևելքում տեղակայված ամերիկյան երկու բազաներ հայտնվել էին Իրաքի շիական իսլամական դիմադրության շարժման կրակի տակ։