Եմենին ԱՄՆ-ի ու Մեծ Բրիտանիայի հարվածներից հետո Նյու Յորքում և Վաշինգտոնում բողոքի ցույցեր են տեղի ունեցել

Տասնյակ ակտիվիստներ հավաքվել են Նյու Յորքի Թայմս Սքուերում և Սպիտակ տան մոտ բողոքի ցույցի այն բանից հետո, երբ ԱՄՆ-ը և Մեծ Բրիտանիան հարվածներ են հասցրել Եմենում հութիների թիրախներին: Այս մասին հայտնում են Reuters-ը և Fox News-ը։

Սպիտակ տան մոտ ցուցարարները ծածանել են պաղեստինյան դրոշները և կրել «Ազատ Պաղեստին» և «Դադարեցնել Եմենի ռմբակոծումը» կարգախոսներով պաստառներ։ Բողոքի ցույցերը կազմակերպել է հակապատերազմական ANSWER կոալիցիան, որը Եմենում հարվածները համարում է «խոշոր էսկալացիա», որը կարող է հանգեցնել լայնածավալ տարածաշրջանային ռազմական հակամարտության, ասվում է խմբի X սոցիալական ցանցի հայտարարության մեջ։

Ավելի վաղ ԱՄՆ նախագահ Ջո Բայդենի որոշումը՝ հարվածներ հասցնել հութիներին՝ շրջանցելով ԱՄՆ Կոնգրեսը, քննադատության էր ենթարկվել որոշ դեմոկրատների և հանրապետականների կողմից։

ՄԱԿ-ի Անվտանգության խորհրդի երեկվա պահանջից հետո հութիներին՝ դադարեցնել Կարմիր ծովում հարձակումները նավերի վրա, ԱՄՆ-ն և Մեծ Բրիտանիան Ավստրալիայի, Բահրեյնի, Կանադայի և Նիդեռլանդների աջակցությամբ հարվածներ են հասցրել Եմենի 60 օբյեկտներին: ԱՄՆ կենտրոնական հրամանատարության ներկայացուցիչները պնդում են, որ հարվածները հասցվել են միայն ռազմական օբյեկտներին։ ԱՄՆ նախագահ Ջո Բայդենը հութիների վրա հարձակումն անվանել է «նավարկության ազատությանը սպառնալիքի պատասխան»։