Անցնող շաբաթվա ամենակարևոր լուրերի ընտրանին

Ձեր ուշադրությանն ենք ներկայացնում անցնող շաբաթվա ամենակարևոր լուրերի ընտրանին. Եվ այսպես,

Հունվարի 8

Հայաստան 2023 թվականին ժամանել է 2 մլն 300 հազար զբոսաշրջիկ, ամենաշատը եկել են Ռուսաստանից: Այս տվյալները ներկայացրել է Զբոսաշրջության կոմիտեի նախագահ Սիսիան Պողօսեանը։

Հայաստանի Հանրապետության անվտանգության խորհրդի քարտուղար Արմեն Գրիգորյանը  հանդիպել է ԱՄՆ Կովկասյան բանակցությունների հարցերով ավագ խորհրդական, ԵԱՀԿ Մինսկի խմբի ամերիկացի համանախագահ Լուի Բոնոյի հետ: Զրուցակիցները քննարկել են հայ-ադրբեջանական հարաբերությունների կարգավորման գործընթացը և անդրադարձել վերջին շրջանում տեղի ունեցած բանակցություններին ու դրանց շրջանակներում ձեռք բերված պայմանավորվածությունների կատարման ընթացքին:

Հունվարի 9

Նախարար Վահան Քերոբյանը  հանդիպել է «Մանթաշյանց» բիզնես ակումբի գործարարների հետ՝ տնտեսության ոլորտում 2023 թ. հիմնական արդյունքներն ու 2024 թ. նախատեսվող ծրագրերը ներկայացնելու նպատակով։

ՀՀ ԱԳՆ-ն հայտնել է, որ ՌԴ-ում հայկական վարորդական վկայականների ճանաչման հարցը երկկողմ քննարկումների օրակարգում է։ 

Հունվարի 10

Պաշտոնական այցով Հայաստան է ժամանել Հունաստանի Հանրապետության արտաքին գործերի նախարար Յորղոս Գերապետրիտիսը

Հայկական կողմը հույս ունի, որ Ադրբեջանը կառուցողական մոտեցում կցուցաբերի, և բանակցություններն ու հանդիպումները կշարունակվեն։ Այս մասին  Հունաստանի ԱԳ նախարարի հետ համատեղ ասուլիսում նշել է Հայաստանի արտգործնախարար Արարատ Միրզոյանը։

ՀՀ պաշտպանության նախարար Սուրեն Պապիկյանը Հունաստանում հանդիպել է երկրի վարչապետի ազգային անվտանգության հարցերով խորհրդական Թանոս Դոկոսին: Հանդիպման ընթացքում քննարկվել են հայ-հունական համագործակցությանը, տարածաշրջանային և միջազգային անվտանգությանն առնչվող հարցեր

Հունվարի 11

ՀՀ նախագահ Վահագն Խաչատուրյանը, հիմք ընդունելով վարչապետ Նիկոլ Փաշինյանի առաջարկությունը, այսօր հրամանագիր է ստորագրել նախկին փոխարտգործնախարար Վահե Գևորգյանին Չինաստանում Հայաստանի դեսպան նշանակելու մասին

Իրանի դեսպան Մեհդի Սոհբանին հայտարարել է, որ այն, ինչը Հայաստանի ինքնիշխանության եւ տարածքային ամբողջականության խախտում կլինի, Իրանի համար ընդունելի չէ

Վարչապետ Նիկոլ Փաշինյանը մասնակցել է Ներքին գործերի նախարարության 2023թ. գործունեության հաշվետվության քննարկմանը: Տեղեկացվել է, որ 2023-ի ընթացքում հաստատվել է Ոստիկանության գվարդիայի ձևավորման հայեցակարգը, մշակվել, ներառական հանրային քննարկումների փուլ է անցել և միջազգային փորձաքննական դրական գնահատականի արժանացել «Ոստիկանության գվարդիայի մասին» և հարակից օրենքների նախագծերի փաթեթը։

Հունվարի 12

2023-ին հարկային եկամուտների եւ պետական տուրքի գծով նախատեսվել էր կատարել 2 տրլն 204 մլրդ դրամ, սակայն ՊԵԿ-ի կողմից փաստացի կատարվել է 2 տրլն 221,9 մլրդ դրամ, գերակատարումը՝ 18 մլրդ դրամ:

ԱԱԾ պետ Արմեն Աբազյանը ազատվել և վերանշանակվել է իր պաշտոնում: Ազգային անվտանգության ծառայության տնօրենի պաշտոնից Արմեն Աբազյանի ազատումը և վերանշանակումը պայմանավորված է  «Ազգային անվտանգության մարմիններում ծառայության մասին» օրենքի փոփոխություններով: 

Միջազգային իրավական հարցերով ներկայացուցչի գլխավորած պատվիրակությունը Հաագայում մասնակցել է Մշտական արբիտրաժային դատարանում կայացած ընթացակարգային հարցերով հանդիպմանը՝ 2023 թվականի փետրվարի 27-ին Ադրբեջանի կողմից Էներգետիկ խարտիայի պայմանագրի (Energy Charter Treaty – ECT) համաձայն նախաձեռնած արբիտրաժի շրջանակներում:

Հունվարի 13

ԵՄ-ում ՀՀ ներկայացուցչության ղեկավար, դեսպան Տիգրան Բալայանը մասնակցել է կլոր սեղան- քննարկմանը, որին ներկա են եղել ԵՄ անդամ երկրների մշտական ներկայացուցիչներ, քաղաքական և անվտանգային կոմիտեի դեսպաններ, Եվրահանձնաժողովի և Արտաքին գործողությունների եվրոպական ծառայության բարձրաստիճան ներկայացուցիչներ։

ՀՀ ԱԳՆ-ն ամփոփել է 2023 թվականին տեղի ունեցած իրադարձությունները: Կայացել են նախարար Միրզոյանի այցերը Եգիպտոս, Սիրիա, Արաբական Միացյալ Էմիրություններ և Բահրեյն: ՀՀ անկախության շրջանում առաջին անգամ ՀՀ ԱԳ նախարարը մասնակցել է Արաբական պետությունների լիգայի խորհրդի` նախարարական մակարդակով նիստին: