Փաշինյանի թիմակիցների մանիպուլյացիաները. Ռոբերտ Ղուկասյան

Շարունակելով ընթերցողի ուշադրությանը ներկայացնել այն պաշտոնյաներին, ովքեր, մեղմ ասած, անկեղծ չեն գտնվել հանրության հետ, փորձել են դիմել մանիպուլյատիվ հնարքների, խմբագրել սեփական հայտարարություններն ու քայլերը՝ այսօր կանդրադառնանք Սյունիքի մարզպետ Ռոբերտ Ղուկասյանին:

Մարդկանց սովի մատնելով` սեփական նպատակին հասնելն անընդունելի է ժամանակակից աշխարհում, ահա այսպիսի կարծիք ուներ և վստահ ենք՝ այսօր էլ ունի Սյունիքի մարզպետն Արցախում տեղի ունեցող գործընթացների շուրջ: Լաչինի միջանցքի ապօրինի շրջափակումից հետո Ղուկասյանը հայտարարել էր․ «Ինչպես մեծահասակները, այնպես էլ երեխաները սովի են մատնված են, և Ադրբեջանը խոսում է ինտեգրման մասին: Բայց, ըստ երևույթին, դրանով ուզում են հասնել ինտեգրման, մարդկանց սովի մատնելով, ինչն անընդունելի է մեզ բոլորիս համար։ Սա միակ ճանապարհն է, և բեռը պետք է հասնի հասցեատիրոջը։ Հակառակ դեպքում, մենք, պարզապես, կդառնանք աղետի լուռ վկաներ»:

Այսօր, ցավոք, Արցախը այլևս կորսված է՝ առաջին հերթին հենց այն քաղաքական թիմի վարած քաղաքականության հետևանքով, որի մի մաս է համաձայնել դառնալ Ղուկասյանը՝ ստանձնելով Սյունիքի մարզպետի պաշտոնը: Սակայն, արդյոք մարզպետը չի ցանկանում շատ ավելի հասցեական գնահատականներ տալ ստեղծված իրավիճակին և այդ իրավիճակի ձևավորման հիմնական մեղավորներին: Հատկապես, մի դեպքում, երբ բոլորն էլ քաջ գիտակցում են, որ Արցախից հետո հերթը Սյունիքինն է: Այն Սյունիքինը, որի զարգացման և բարեկեցության համար մինչ հեղափոխությունը տարիներ շարունակ աշխատել է Ռոբերտ Ղուկասյանը:

Սյունիքի մարզպետ Ռոբերտ Ղուկասյանը հայտարարում է, որ իրեն ՊՆ-ն չի զեկուցում, թե սահմանագծման և սահմանազատման ինչ գործողություններ են կատարվում Սյունիքում: Ասել է թե՝ Սյունիքից անգամ եթե որոշ տարածք պակասի, մեղավորը ինքն չէ, այլ ՊՆ-ն: Իսկ թե ինքը՝ որպես մարզպետ, ինչ է արել, որպեսզի հասկանա սահմանային իրավիճակը և հարկ եղած դեպքում նաև կարծիք արտահայտի կամ գնահատական հնչեցնի, հայտնի չէ:

Դեռևս 2021 թվականին Նիկոլ Փաշինյանը ներկայացրեց իր և իր խորհրդական Ռոբերտ Ղուկասյանի նամակագրությունը, որում Ղուկասյանն ասում էր, որ 1 օրում այցելել է շրջափակման մեջ հայտնված 6 գյուղեր, իսկ Փաշինյանն էլ զարմացել է, որ 6 գյուղում 250 ընտանիք է ապրում: Այդ հայտարարությունը ֆեյսբուքյան շատ օգտատերերի անհավանական թվաց, որ Ռոբերտ Ղուկասյանը 1 օրում 250 ընտանիքի է այցելել, բլոգեր Տիգրան Քոչարյանը նույնիսկ թվաբանական հաշվարկ էր կատարել՝ պարզելով, որ նվազագույն հաշվարկներով Ռոբերտ Ղուկասյանին դրա համար 1.7 օր պետք կլիներ․

Նախորդ տարվա օգոստոսի 25-ին պետք է տեղի ունենար Կապան-Երևան թռիչքը, սակայն այն չեղարկվել էր, քանի որ երկու օր առավոտից թշնամին կրկին կրակել էր օդանավակայանի ուղղությամբ։ Սակայն իշխանությունները, այդ թվում՝ ի դեմս Սյունիքի մարզպետի, պաշտոնապես լրատվամիջոցներին հայտարարում էին, թե թռիչքը չեղարկվել է անբարենպաստ եղանակի պատճառով։