ՔՊ-ականների հերթական ֆիասկոն պառլամենտական դիվանագիտության հարթակում

Ռուանդայի մայրաքաղաք Կիգալիում գտնվում է տուտսիների ցեղասպանությանը նվիրված հուշահամալիրը, որը բացվել է 2004 թվականին։ Ֆրանսիական Le Point պարբերակը գրում է, որ բացատրական սենյակը նվիրված է 20-րդ դարի սկզբից ի վեր տեղի ունեցած այլ ցեղասպանություններին։ Սկսվում է առաջինից՝ 1904 թվականին գերմանացիների կողմից Նամիբիայի հերերոսների և նամաների ցեղասպանությունից: Հետո գալիս է Հոլոքոստը, այնուհետև Կամբոջայում Կարմիր քմերների կողմից իրականացված կոտորածները, 1995 թվականին բոսնիացի սերբերի կողմից Սրեբրենիցայի ցեղասպանությունը, իսկ վերջերս՝ ԻԼԻՊ-ի ջիհադականների կողմից Իրաքի եզդիների ջարդերը: 1915 թվականի Հայոց ցեղասպանության մասին, սակայն, ոչ մի հետք չկա։ Նշվում է, որ սկզբում Հայոց ցեղասպանությանը նվիրված պատ է եղել, սակայն հետագայում այն հեռացվել է։ Ռուանդայի քաղաքականությունից տեղյակ աղբյուրի կարծիքով՝ բացատրությունը քաղաքական է։ Նշվում է, որ Կիգալին տեղի է տվել Թուրքիայի ճնշմանը։

2022-ին հայ պառլամենտականների պատվիրակությունը մեկշաբաթյա աշխատանքային այցով պետբյուջեի հաշվին մեկնել էր Ռուանդա՝ Միջխորհրդարանական միության 145-րդ վեհաժողովի աշխատանքներին մասնակցելու համար: Պատվիրակության կազմում 7 անձ էր՝ «Քաղաքացիական պայմանագիր» խմբակցության պատգամավորներ Ծովինար Վարդանյանը, Հերիքնազ Տիգրանյանը, Հասմիկ Հակոբյանը և այլք:  Նախորդ տարի էլ ՔՊ-ական պատգամավոր Հռիփսիմե Գրիգորյանն էր հուլիսի 16-21-ը գործուղվել Ռուանդա՝ մասնակցելու «Կանայք ներկայացնում են» խորագրով կոնֆերանսին: Ինչով են հայ պառլամենտականներն այնտեղ զբաղվել՝ դժվար  է ասել, սակայն ակնհայտ է, որ ոչ հայկական շահերի կամ Հայ Դատի թեման առաջ մղելով, հակառակ դեպքում՝ ականատես չէինք լինի նման հակահայկական որոշմանը: Հարկատուների հաշվին վոյաժների մեկնող ՔՊ-ականներն ամեն առիթով հայտարարում են, որ իրենք կարևոր գործ են անում արտասահմանյան գործուղումների մեկնելիս, զարկ են տալիս խորհրդարանական դիվանագիտության զարգացմանը: Սակայն, ինչպես տեսնում ենք, հերթական անգամ գործ ունենք ՔՊ-ականների ֆիասկոյի հետ, և դեռ, անշուշտ, մեծ հարց է՝ հայ պառլամենտականները չեն կարողացել, թե չեն ցանկացել կանխել նման հակահայկական որոշումների ընդունումը...