Հոկտեմբերի 16-ը Գյուղատնտեսության աշխատողի օր

Հոկտեմբերի 16-ին` Գյուղատնտեսության աշխատողի օրը, ՀՀ գյուղատնտեսության նախարար Սերգո Կարապետյանի հյուրերն էին «Հայագրոֆորում» համաժողովի շրջանակներում Հայաստանում գտնվող սփյուռքահայ ֆերմերները

, որոնք ներկայացնում են Ռուսաստանը, Ուկրաինան, Վրաստանը, Լիբանանը, Իրանը, Լեհաստանը, Լատվիան, ԱՄՆ-ն եւ Ֆրանսիան:Հանդիպմանը ներկա էին նաեւ ԼՂՀ պատվիրակները:

Ըստ նախարարության տարածած մամլո հաղորդագրության, շնորհակալություն հայտնելով առաջին անգամ անցկացվող հայ ֆերմերների համաժողովին մասնակցելու համար, Սերգո Կարապետյանը կարեւորել է Հայաստան-Սփյուռք համագործակցությունը Հայաստանի տնտեսության զարգացան գործում:

«Պետական ու միջազգային կառույցների հետ սերտ համագործակցության, ինչպես նաեւ վերջին տարիներին իրականացվող նպատակային ծրագրերի շնորհիվ կարողացել ենք ապահովել որոշակի առաջընթաց: Գյուղատնտեսական համատեղ ծրագրերի իրականացումը նոր խթան կհանդիսանա ոլորտի զարգացման համար», - նշել է ՀՀ գյուղատնտեսության նախարարը` հորդորելով սփյուռքահայ գործարարներին հնարավորինս մասնակցել հայրենի գյուղատնտեսության զարգացման ծրագրերին:

Արտահայտելով եռօրյա միջոցառումների կապակցությամբ մասնակիցների գոհունակությունը` Լիբանանը ներկայացնող Եսայի Հավատյանը մասնավորապես նշել է, որ նման ձեւաչափով համաժողովը շարունակություն պետք է ունենա, եւ երկրի գյուղատնտեսության զարգացման վաղվա օրը, իրոք, պայմանավորված է համազգային ջանքերով:

Ելույթ ունեցող մյուս ֆերմերները նույնպես կարեւորեցին «Հայագրոֆորում» -ի ժամանակ ձեռք բերված անմիջական շփումներն ավելի գործնական դարձնելը, շնորհակալություն հայտնելով ՀՀ գյուղատնտեսության նախարար Սերգո Կարապետյանին համագործակցության նման հնարավորություն ստեղծելու համար: