Իրանը Պակիստանից բացատրություն է պահանջել

Թեհրանը բացատրություն է պահանջել Իսլամաբադից՝ կապված Պակիստանի ռազմաօդային ուժերի հրթիռային հարձակումների հետ Իրանում թիրախների վրա։ Այս մասին Press TV-ին հայտնել է Իրանի անվտանգության ուժերի ներկայացուցիչը։

Նրա խոսքով, «Իրանը Պակիստանից անհապաղ բացատրություն է պահանջել Սիստան և Բելուջեստան նահանգի սահմանամերձ գյուղերից մեկի վրա իրականացրած հրթիռային հարձակումների վերաբերյալ»։

Ավելի վաղ Պակիստանի ԱԳՆ-ն հայտնել էր, որ պակիստանցի զինվորականները հակաահաբեկչական գործողություն են իրականացրել, որի շրջանակներում հարվածներ են հասցվել Իրանի Սիստան և Բելուջիստան նահանգում ահաբեկիչների թաքստոցներին։ Տարածաշրջանային իշխանությունների տվյալներով՝ Պակիստանի հարվածի հետևանքով զոհվել է երեք կին և չորս երեխա, բոլորն էլ` օտարերկրացիներ։

Հունվարի 16-ին իրանական Tasnim գործակալությունը հայտնել էր, որ Իրանի զինված ուժերը հարձակվել են Պակիստանի տարածքում տեղակայված «Ջեյշ ալ Զոլմ» ահաբեկչական խմբավորման երկու շտաբների վրա։ Գործողության ընթացքում օգտագործվել են անօդաչու թռչող սարքեր և հրթիռներ։ Պակիստանի ԱԳՆ-ն դատապարտել է հարվածը՝ այն անվանելով երկրի օդային սահմանների խախտում, որը կարող է հանգեցնել լուրջ հետեւանքների։ Գերատեսչությունից հայտնել են, որ հարվածի հետևանքով` երկու երեխա է զոհվել։

Ավելի վաղ հայտնել ենք, որ Պակիստանի ԱԳՆ–ն հայտարարել է՝ Իսլամաբադն իրավունք ունի պատասխանել Իրանին։