Հութիները Ադենի ծոցում հարձակվել են ամերիկյան նավի վրա

Եմենի հյուսիսում իշխող Անսար Ալլահի (հութիների) շիա շարժման զինված ուժերը հայտարարել են Ադենի ծոցում ամերիկյան Chem Ranger նավի վրա հարձակման մասին, հայտնում է Al Jazeera-ն։

Եմենի խմբավորումը հայտարարել է, որ «ծովային հրթիռներ» է արձակել նավի վրա և ուղիղ հարվածներ է հասցրել:

«Եմենի զինված ուժերը հաստատում են, որ ԱՄՆ-ի և Մեծ Բրիտանիայի հարձակումներին պատասխան գործողություններն անխուսափելի են, և որ ցանկացած նոր ագրեսիա անպատիժ չի մնա»,- ասվում է հութիների հայտարարության մեջ:

Իր հերթին, Մեծ Բրիտանիայի ծովային առևտրի օպերացիոն գրասենյակը հայտնել է, որ տեղեկություն է ստացել Եմենի Ալ Շիհրից մոտավորապես 85 ծովային մղոն դեպի հարավ-արևելք գտնվող անվտանգության միջադեպի մասին:

«Հաղորդում է ստացվել չորս անհայտ անօդաչու թռչող սարքերի մասին, որոնք թռչում են Եմենի Աշ Շիհր քաղաքից 85 ծովային մղոն հարավ-արևելք գտնվող առևտրային նավի մոտ», - ասվում է գերատեսչության հայտարարության մեջ:

Նշվում է, որ անօդաչուներից մեկն ընկել է անմիջապես նավի հարևանությամբ։