Իրաքում հրթիռակոծել են ամերիկյան ռազմաօդային բազան

Իրաքի արևմտյան Անբար նահանգում գտնվող Այն ալ-Ասադ ամերիկյան ավիաբազան հրթիռակոծության է ենթարկվել։ Այս մասին հայտնում է AlHadath հեռուստաալիքը։

Աղբյուրը հեռուստաալիքին հայտնել է, որ Այն ալ-Ասադ բազայի վրա ավելի քան 20 հրթիռ է արձակվել։ Նա նշել է, որ անվտանգության ստուգումներ են իրականացվել այն հատվածում, որտեղից հրթիռներն արձակվել են ռազմաբազայի ուղղությամբ։

Հարձակման պատասխանատվությունը ստանձնել են լիբանանյան «Հեզբոլլահը» և իրաքյան «Ալ-Նուջաբան», նշել է AlHadath–ը:

Պաղեստինա-իսրայելական հակամարտության սրման սկզբից պարբերաբար հրթիռակոծվում են Իրաքում գտնվող ամերիկյան բազաները։ Ահաբեկչությունների պատասխանատվությունը ստանձնել են Իրաքում գործող զինված շիա խմբավորումները։