Փաշինյանի թիմակիցների մանիպուլյացիաները. Տավրոս Սափեյան

Դեկտեմբերյան խժդժություններից հետո Թալինում կրկին ընտրություններ անցկացվեցին՝ նախորդ տարվա սեպտեմբերին և կրկին ականատես չենք լինում տված խոստումների իրականացմանը: Համայնքապետարանի պաշտոնական կայքէջն էլ որևէ կերպ չի վկայում տրված խոստումների կատարման մասին: Սափեյանն աշխատանքային այցեր է կատարել տարբեր բնակավայրեր, հանրային քննարկումներ է անցկացրել, ասֆալտապատվել է մեկ փողոց, մեկ ավտոբուս է համայնքը նվեր ստացել, մի շարք շենքերի բակերում ապամոնտաժման աշխատանքներ են տարվել, մանկապարտեզին խաղալիքներ են նվիրվել համայնքապետի անունից: Իհարկե, ինչպես ասում էին՝ կարող էին նաև այս ամենը չանել, սակայն, համաձայնեք, որ բազմապիսի խոստումներ շռայլելուց հետո ավտոբուս նվեր ստանալը և մանկապարտեզին խաղալիք նվիրելն այն տիտանական աշխատանքը չէ, որի համար թալինցին իր քվեն տվել էր ՔՊ-ն ներկայացնող Սափեյանին։

 

Ամիսներ առաջ մամուլը գրել էր, որ Արագածոտնի մարզի Թալին խոշորացված համայնքում բունտ է հասունանում՝ Փաշինյանի երբեմնի աջակիցները դեմ են նրա ղեկավարած «Քաղաքացիական պայմանագիր» կուսակցության առաջադրած համայնքապետի թեկնածուին՝ Տավրոս Սափեյանին։ «Տավրոս Սափեյանը չի վայելում ո՛չ Թալին քաղաքի, ո՛չ էլ համայնքում ընդգրկված մյուս գյուղերի բնակիչների հարգանքը։  Մենք ատում ենք իրենց, իրենց բեսպրեդել վիճակը։ Ամբողջ Թալինն իրենով է արել, Քարակերտի Ջրային կոմիտեն իրենով է արել, հորեղբոր տղուն՝ Անդրանիկ Սափեյանին, հայտնի միջադեպով՝ կրակոցներով, նշանակեց ջրայինի պետ․․․ Մի խոսքով՝ մենք ամեն ինչ անելու ենք, որպեսզի ինքը չլինի մեր համայնքապետը»,-նշում էին թալինցիները։  Չնայած այս հանգամանքին՝ Սափեյանը հայտարարում էր, որ վայելում է բնակիչների և թիմի վստահությունը:

 

Ընդամենը վերջերս էլ հայտնի դարձավ, որ  Թալին համայնքի ղեկավար Տավրոս Սափեյանը նախորդ տարի երկու պայմանագիր է կնքել իր ընտանիքին պատկանող գազալցակայանի հետ։ Երկու պայմանագրերի հանրագումարը կազմում է 15 մլն 714 000 դրամ։ «Սափեյան եղբայրներ» ՍՊԸ-ն այս տարի երեք անգամ մասնակցել է Թալինի համայնքապետարանի համար հեղուկ և սեղմված բնական գազ ձեռք բերելու նպատակով հայտարարված գնումներին, որից երկուսում հաղթող է ճանաչվել։ Ընդ որում, այդ երկու մրցույթների ժամանակ նա միակ հայտատուն է եղել։  Տավրոս Սափեյանը հորեղբոր՝ «Սափեյան եղբայրներ» ՍՊԸ–ի գործադիր տնօրեն Ժորա Սափեյանի հետ պայմանագրերից մեկը կնքել է 2023թ․ հունվարի 3-ին, մյուսը՝ այս տարվա ապրիլի 5–ին։ «Սափեյան եղբայրներ» ՍՊԸ–ն պետական ռեգիստրում գրանցվել է 1999թ․–ին։ Ընկերությունում հավասար բաժեմասեր ունեն Թալին համայնքի ղեկավար Տավրոս Սափեյանի հայրը՝ Էդիկ Սափեյանը, և հորեղբայրը՝ Ժորա Սափեյանը։  Ինչպես տեսնում ենք, Հայաստանում տեղական ինքնակառավարման մակարդակում շահերի բախումը դրսեւորվում է, հիմնականում, ձեռնարկատիրական ոլորտում: Համայնքներում, որպես կանոն, խանութը, բենզալցակայնը, գազալցակայանը եւ այլ կարեւոր ձեռնարկատիրական օբյեկտներ համայնքի ղեկավարի, նաև՝ ավագանու անդամների սեփականությունն են: