Բաքվում ստորագրվել է ադրբեջանա-ռուսական համագործակցության 2024-2026 թթ․ «ճանապարհային քարտեզը»

Հունվարի 23-ին Ադրբեջանի Հանրապետության փոխվարչապետ Շահին Մուստաֆաևը հանդիպել է Ադրբեջանում գտնվող Ռուսաստանի Դաշնության փոխվարչապետ Ալեքսեյ Օվերչուկի հետ։

«Հանդիպմանը գոհունակություն է արտահայտվել տարբեր ոլորտներում ադրբեջանա-ռուսական բարեկամական հարաբերությունների հաջող զարգացման կապակցությամբ։

Հատկապես նշվել է, որ 2022 թվականի փետրվարի 22-ին Մոսկվայում Ադրբեջանի և Ռուսաստանի նախագահների կողմից «Ադրբեջանի Հանրապետության և Ռուսաստանի Դաշնության միջև դաշնակցային համագործակցության մասին հռչակագրի» ստորագրումը երկկողմ հարաբերությունները որակապես նոր մակարդակի է հասցրել»,– ասվում է ադրբեջանական ԶԼՄ–ների կողմից տարածված հաղորդագրության մեջ։

Նշվում է, որ Մուստաֆաևը և Օվերչուկը ստորագրել են «2024-2026 թվականների ադրբեջանա-ռուսական համագործակցության առանցքային ուղղությունների զարգացման վերաբերյալ ճանապարհային քարտեզը»։

Ճանապարհային քարտեզը նախատեսում է կոնկրետ քայլեր՝ զարգացնելու համագործակցությունը առևտրի, տնտեսական և ներդրումային, տրանսպորտի, արդյունաբերության, գյուղատնտեսության, էներգետիկայի, զբոսաշրջության, հումանիտար և սոցիալական, ինչպես նաև պարենային անվտանգության, նորարարության և տեղեկատվական տեխնոլոգիաների ոլորտներում։