Պատերազմն անխուսափելի է. Մեդվեդևը պատասխանել է ԱՄՆ Պետդեպարտամենտի՝ Ալյասկան վերադարձնելու մերժմանը

ՌԴ Անվտանգության խորհրդի փոխնախագահ Դմիտրի Մեդվեդևը մեկնաբանել է ԱՄՆ Պետդեպարտամենտի ներկայացուցչի խոսքերն այն մասին, որ Ռուսաստանը հետ չի ստանա Ալյասկայի թերակղզին։

«Պետդեպարտամենտի ներկայացուցչի խոսքով՝ Ռուսաստանը չի վերադարձնի Ալյասկան, որը վաճառվել է ԱՄՆ-ին 19-րդ դարում։ Հիմա ամեն ինչ վերջացած է: Մենք սպասում էինք, որ Ալյասկան մերը կդառնա։ Հիմա պատերազմն անխուսափելի է»,- հեգնանքով գրել է նա X-ի իր անգլալեզու էջում:

Ինչպես հայտնել ենք, ԱՄՆ Պետդեպարտամենտի մամուլի քարտուղարի տեղակալ Վեդանտ Պատելը հունվարի 22-ին կայացած ճեպազրույցի ժամանակ ասել էր, որ «Ռուսաստանի նախագահ Վլադիմիր Պուտինը չի ստանա Ալյասկան»։ Այսպես էր նա պատասխանել լրագրողի այն հայտարարությանը, թե Պուտինը հրամանագիր է ստորագրել, որով Ալյասկայի վաճառքն ԱՄՆ-ին «անօրինական» է անվանել։

Ռուսական պարբերականները գրում են, որ այն պորտալում, որտեղ հրապարակվում են իրավական ակտեր, ՌԴ նախագահի կողմից ստորագրված նման հրամանագիր չկա։