Արևմուտքը սխալ է համարում ՌԴ–ի դերը Ադրբեջանի և Հայաստանի միջև կարգավորման հարցում․ Լավրով

Արևմուտքը որոշել է, որ Ռուսաստանի Դաշնության դերը Ադրբեջանի և Հայաստանի միջև կարգավորման հարցում սխալ է և փորձում է նրանց «գայթակղել» դեպի Բրյուսել, Փարիզ և Վաշինգտոն։ Այս մասին հայտարարել է ՌԴ ԱԳ նախարար Սերգեյ Լավրովը ՄԱԿ-ի Անվտանգության խորհրդի միջոցառումներին մասնակցելուց հետո կայացած մամուլի ասուլիսում, հաղորդում է ՏԱՍՍ–ը։

«Անձամբ [Ռուսաստանի] նախագահ Վլադիմիր Պուտինը որոշիչ դեր է խաղացել այն հարցում, թե ինչպես հնարավոր եղավ դադարեցնել պատերազմը 2020 թվականի նոյեմբերին, և ինչպես են համաձայնեցվել մի քանի եռակողմ փաստաթղթեր՝ հայ-ադրբեջանական-ռուսական ամենաբարձր մակարդակով, որոնցում սահմանվում են կարգավորման առանցքային պարամետրերը, այդ թվում՝ սահմանների սահմանազատման, առևտրի և տրանսպորտային ուղիների ապաշրջափակման և խաղաղության պայմանագրի ստորագրման հարցերը»,- նշել է նա։

«Վերջերս մենք տեսանք, թե ինչպես այս պայմանավորվածությունները ձեռք բերելուց հետո արևմտյան գործընկերները որոշեցին, որ ինչ-որ տեղ սխալ է, որ Ռուսաստանին հաջողվում է առաջընթացի հասնել այս ուղղությամբ, և նրանք սկսեցին հրապուրել հայերին ու ադրբեջանցիներին դեպի Բրյուսել, Փարիզ, Վաշինգտոն, Պրահա»,- հավելել է նախարարը։

Լավրովն անդրադարձել է նաև Արցախում ռուս խաղաղապահ առաքելության հարցին՝ նշելով․

«Ղարաբաղում Ռուսաստանի խաղաղապահների տեղակայման հարցը հայկական կողմին չի վերաբերում, դա Մոսկվայի և Բաքվի հարցն է»։