Իրանը և Թուրքիան համագործակցությամբ կարող են լուծել տարածաշրջանային և գլոբալ բազմաթիվ խնդիրներ․ Ռայիսի

Իրանի և Թուրքիայի նախագահներ Էբրահիմ Ռայիսին և Ռեջեփ Թայիփ Էրդողանը երկկողմ ձևաչափով հանդիպումից հետո հանդես են եկել հայտարարություններով։ 

Իրանական ԶԼՄ-ների փոխանցմամբ՝ Էրդողանը դատապարտել է Քերմանի ահաբեկչությունը՝ նշելով, որ աջակցում են Իրանին ահաբեկչության դեմ պայքարում․ «Էբրահիմ Ռայիսիի հետ մեր հանդիպմանը քննարկել ենք տարածաշրջանային և միջազգային խնդիրները, հատկապես՝ իսրայելական հարձակումները։ Շարունակելու ենք զարգացնել Իրանի հետ մեր հարաբերությունները՝ մեր երկրների և մեր տարածաշրջանի շահերին համապատասխան»,- ասել է Էրդողանը։ 

Իրանի նախագահն էլ իր հերթին ասել է․ «Մենք և Թուրքիան, որպես երկու մեծ և հզոր երկրներ, համագործակցությամբ կարող են լուծել տարածաշրջանային և գլոբալ բազմաթիվ խնդիրներ։

Թուրքիայի անվտանգությունը մեր անվտանգությունն է։ Սիոնիստները ցանկանում են պառակտել տարածաշրջանի երկրներին, դրան դիմակայելու ճանապարհը տարածաշրջանային համագործակցությունն է»։