Մեկդարյա ընդմիջումից հետո իր դռներն է բացելու Որդվոց Որոտման եկեղեցին

Թուրքիայի Ստամբուլ քաղաքում մոտ մեկ դար ընդմիջումից հետո այսօր Անկարայի ժամանակով ժամը 16։00–ին իր դռներն է բացելու Կ.Պոլսի Հայոց պատրիարքարանի դիմաց գտնվող Որդվոց Որոտման եկեղեցին։ Առաջին համաշխարհային պատերազմից հետո եկեղեցին Թուրքիայի մշակույթի նախարարության կողմից օգտագործվել է որպես մշակույթի տուն:

Այս մասին է հաղորդում թուրքական «Ռադիկալ» պարբերականը։

Կ.Պոլսի Հայոց պատրիարքության պատրիարքական ընդհանուր փոխանորդ Արամ արքեպիսկոպոս Աթեշյանի գլխավորությամբ տեղի է ունենալու Առաջին համաշխարհային պատերազմից հետո փակված եկեղեցու բացման հանդիսավոր արարողությունը, որին մասնակցելու է նաև Թուրքիայի առևտրի նախարարը։

Վերանորոգման աշխատանքներն իրականացվել են «Ստամբուլը 2010թ. եվրոպական մշակույթի մայրաքաղաք» ծրագրի շրջանակում։ Վերանորգման ծախսերի 70 տոկոսը պետությունն է հոգացել, իսկ 30 տոկոսը՝ Գումգափուի հայկական եկեղեցու հիմնադրամը:

Վերաբացվելուց հետո եկեղեցին ծառայելու է նաև որպես մշակութային կենտրոն՝ պահպանելով սրբավայր լինելու իր նշանակությունը։ Եկեղեցում եկեղեցական արարողություններ են կատարվելու, մոմավառության համար հատուկ տեղ է լինելու։