Ստամբուլի Սուրբ Մարիամ եկեղեցում տեղի ունեցած հրաձգության առնչությամբ 47 մարդ է ձերբակալվել, այդ թվում՝ ՌԴ քաղաքացի

Թուրքական ոստիկանությունը հունվարի 28-ին եկեղեցում տեղի ունեցած հրաձգության առնչությամբ՝ ձերբակալել է 47 մարդու, այդ թվում՝ Ռուսաստանի քաղաքացու։ Այս մասին լրագրողներին հայտնել է Թուրքիայի ներքին գործերի նախարար Ալի Էրլիքայան, փոխանցում է ՏԱՍՍ-ը։

«Եկեղեցու վրա զինված հարձակման գործի հետաքննության շրջանակում գործողություններ են իրականացվել 30 հասցեներում, բերման է ենթարկվել 47 մարդ, այդ թվում՝ Ռուսաստանի և Տաջիկստանի մեկ քաղաքացի, որոնք կարող են կապված լինել «Իսլամական պետության» հետ»,- ասել է նա։

Ինչպես հայտնի է, հունվարի 28-ին՝ տեղական ժամանակով մոտավորապես 11:40-ին, Թուրքիայի Սարիեր շրջանի Սուրբ Մարիամ կաթոլիկ եկեղեցում երկու դիմակավորված անձինք ծառայության ժամանակ կրակ են բացել, ինչի հետևանքով՝ սպանվել է 1972 թվականին ծնված Թուրքիայի քաղաքացի։

Թուրքիայի նախագահ Ռեջեփ Թայիփ Էրդողանը ավելի վաղ հավաստիացրել էր, որ հարձակման մասնակիցները 24 ժամվա ընթացքում կձերբակալվեն։ Թուրքիայի դատախազությունը արգելել է միջադեպի վերաբերյալ այլ տեղեկություններ հրապարակել։