Փաշինյանը նոր «զենք» է տալիս Թուրքիային և Ադրբեջանին՝ ընդդեմ Հայաստանի

Կառավարությունը հեշտացրել է օտարերկրյա քաղաքացիների և քաղաքացիություն չունեցող անձանց համար Հայաստանի պետական գաղտ­­նիք պարունակող տեղեկություններին հասանելիության կարգը՝ ուժը կորցրած ճանաչելով 1997 թվականի նոյեմբերի 29-ին ընդունված այն օրենքը, որով, ի թիվս այլ սահմանափակումների, Հայաստանի պետական գաղտնիք համարվող տեղեկությունը նշված խմբին հնարավոր էր տրամադրել, եթե ունեն ՀՀ-ում մշտական բնակություն՝ առնվազն 3 տարի ժամկետով։

Ստացվում է, որ կառավարությունն այդ պահանջը վերացրել է, և օտարերկրյա քաղաքացին կամ քաղաքացիություն չունեցող անձը ՀՀ-ում աշխատելիս և որոշակի կառույցներում գիտական աշխատանք կատարելիս կարող է դիմել և ստանալ պետական գաղտնիք համարվող տեղեկություն։ Բնականաբար, առաջին միտքը, որ առաջանում է, այն է, որ այս քայլը լուրջ հարված է հասցնելու ՀՀ ազգային անվտանգությանը և պատերազմի շեմին գտնվող երկրի ղեկավարությունից շատ ավելի տրամաբանական կլիներ ակնկալել տրամագծորեն հակառակ քայլեր՝ ուղղված պետական գաղտնիքի հասանելիության խստացմանը: Սակայն, մենք տեսնում ենք, որ Փաշինյանն ու թիմակիցները ժողովրդավարության բաստիոնի դերի մեջ մղած կրկին վտանգում են ՀՀ անվտանգությունը: Ո՞վ կարող է երաշխավորել, որ այդ օտարերկրյա քաղաքացիների շարքում շատ պատահական կերպով չեն հայտնվի թուրք կամ ադրբեջանցի գիտնականները, կամ այդ երկրների ֆինանսավորմամբ գործող հիմնադրամների, ՀԿ-ների անդամները, որոնք հեշտ ու հանգիստ կկարողանան հասանելիություն ստանալ ՀՀ պետական գաղտնիքին: Ստացվում է, որ այս փոփոխությամբ Նիկոլ Փաշինյանը հերթական «զենքն»  է տալիս Թուրքիային և Ադրբեջանին՝ ընդդեմ Հայաստանի: