Մեկնարկեց Orange գրքի մրցույթի երկրորդ փուլը

Հոկտեմբերի 15-ից մեկնարկեց «Orange գրքի մրցանակ 2011» գրքի մրցույթի երկրորդ փուլը' հանրային քվեարկությունը: Առաջին փուլի արդյունքներով, որի ընթացքում ժյուրիի անդամները պետք է ընտրեին առավելագույնը չորս ստեղծագործություն յուրաքանչյուր ժանրում:

Երկրորդ փուլում ընթերցողների լայն զանգվածների դատին են հանձնվում հետեւյալ ստեղծագործությունները.

Վեպ.

• «Փետրափոխում» (Հրաչ Բեգլարյան)
• «Շների համաստեղությունը» (Նարինե Կռոյան)

Հեքիաթ.

• «Անկիմյուրի բնակիչները» (Արմինե Աբրահամյան)

էսսե.

• «Քաղաքը» (Վարդան Ֆերեշեթյան),
• «Կամուրջ դեպի Տանյան` արտասովոր բանաստեղծն ու կինը» (Վիոլետ Գրիգորյան),
• «Անքնություն Փարիզում» (Վահրամ Մարտիրոսյան)
• «Վագոնից թռչելու ժամանակը» (Արմեն Շեկոյան)

Պատվածք.

• «Մահապատժից ժամեր առաջ» (Պարույր Սանթրոսյան),
• «Ֆուտբոլի գնդակի երազանքը» (Տաթեւ Դերզյան),
• «Մատրյոշկա» (Արմեն Օհանյան),
• «96» (Մարինե Քոչարյան)

Սցենար.

• «Չարենց» (Վահրամ Մարտիրոսյան)

Ժյուրիի առաջարկով էսսեները եւ պատմվածքները, որոնք պետք է մրցեին նույն կատեգորիայում, առանձնացվել են եւ ներկայացված են երկու կատեգորիայով: Հեքիաթ եւ սցենար/դրամատիկական գործ կատեգորիաներում ժյուրիի բարձր գնահատականին արժանացել են միայն մեկական գործ, որոնք էլ ավտոմատ կերպով կհամարվեն որպես տվյալ անվանակարգում հաղթող: Ընթերցասերները կկարողանան Orange-ի կայքում ծանոթանալ այս գործերին հատվածաբար:

Վեպ, էսսե եւ պատմվածք անվանակարգերում հաղթողները կընտրվեն ընթերցողների առցանց քվեարկությամբ:

«Շնորհավորում ենք բոլոր նրանց, ովքեր արժանացել են ժյուրիի հավանությանը: Այս պահից սկսվում է շատ հետաքրքիր շրջան, երբ բոլոր ընթերցասերները կարող են կարդալ ու իրենց կարծիքը հայտնել մասնակից գործերի վերաբերյալ եւ ընտրել, թե որ գործն է տպագրվելու: Սա բացառիկ պահ է, քանի որ սովորաբար ընթերցողները գործը բացահայտում են այն ժամանակ, երբ այն արդեն գրքի է վերածվել: Սա է Orange Գրքի մրցույթի առանձնահատկությունը. այն ավելի շուտ ոչ թե գրական մրցանակ է, այլ ընթերցողի եւ գրքի սիրահարների մրցանակ: Հուսով ենք, որ հանրային ընթերցանությունների, քննարկումների եւ հեղինակների հետ հանդիպումների միջոցով մենք կներգրավենք ընթերցողների ամենալայն շրջանակներին եւ կխթանենք հետաքրքրությունը ընթերցանության նկատմամբ: Չէ՞ որ հաջորդ տարի Երեւանը Գրքի համաշխարհային մայրաքաղաքն է լինելու»,- ասաց Orange-ի գլխավոր տնօրեն Բրունո Դյութուան:

Այսօրվանից սկսած եւ մինչեւ նոյեմբերի 7-ը առաջին փուլը հաղթահարած մասնակիցների գործերը կարելի է կարդալ առցանց Orange-ի վեբ կայքում: Հենց նույն էջում էլ կարելի է քվեարկել դուր եկած ստեղծագործության օգտին` Facebook սոցիալական ցանցի միջոցով սեղմելով յուրաքանչյուր ստեղծագործության մոտ հասանելի "like" կոճակը:

Յուրաքանչյուր ժանրում հաղթող ճանաչված ստեղծագործությունը կհրատարակվի առանձին գրքով, 500 տպաքանակով: Մրցույթի հաղթողները կհայտարարվեն նոյեմբերի 11-ին կայանալիք մրցանակաբաշխության ժամանակ:

Հիշեցնենք, որ մրցույթի չորս անվանակարգերում' պատմվածք եւ էսսե, վեպ, հեքիաթ, դրամատիկական գործ եւ սցենար, մասնակցում են նրանք, ովքեր ստեղծագործում են հայերենով, ներկայացրել են նախկինում չհրատարակված գրական երկ եւ մշտապես բնակվում են Հայաստանում:

Մրցույթի նպատակն է խթանել հետաքրքրությունը ընթերցանության նկատմամբ, բացահայտել ժամանակակից հայ գրողներին, օրեցօր զարգացող էլեկտրանային մեդիայի միջոցով տարածել նրանց ստեղծագործությունները ընթերցողների առավել լայն զանգվածներին: Այս նախաձեռնությամբ Orange-ը նաեւ պատրաստվում է Երեւանի հետ միասին նշել գրքի եւ ընթերցանության տոնը' ընթառաջ գնալով 2012թ., երբ Երեւանը կդառնա գրքի համաշխարհային մայրաքաղաքը: Orange գրքի մրցանակը կազմակերպվում եւ իրականացվում է «Հայ գրքի կենտրոն» հասարակական կազմակերպության հետ միասին: