Փաշինյանի թիմակիցների մանիպուլյացիաները. Դավիթ Սարգսյան

Շարունակելով ընթերցողի ուշադրությանը ներկայացնել այն պաշտոնյաներին, ովքեր, մեղմ ասած, անկեղծ չեն գտնվել հանրության հետ, փորձել են դիմել մանիպուլյատիվ հնարքների, խմբագրել սեփական հայտարարություններն ու քայլերը՝ այսօր կանդրադառնանք Դիլիջանի քաղաքապետ Դավիթ Սարգսյանին:

Նշենք, որ վերջինիս ԺՊ նշանակվելուց անմիջապետ հետո սոցցանցերում ձևաթուղթ էր հրապարակվել, որտեղ նորանշանակ ղեկավարն իր անձնական տվյալները լրացնելիս վրիպումներ էր թույլ տվել: Մասնավորապես՝ սեռը նշելու հատվածում գրել էր արու, իսկ մասնագիտություն բաժինը ջնջումներով էր լրացրել:

Փաստաթղթի վերաբերյալ Դավիթ Սարգսյանը պարզաբանում էր գրել իր ֆեյսբուքյան էջում՝ պնդելով, որ ներկայացված ձևաթուղթը կեղծված է. «Սիրելի՛ դիլիջանցիներ, վերջին ամիսներին հայ հասարակությանը մշտական սթրեսի մեջ պահող, ստերի ու զրպարտությունների անհատակ ջրհոր հիշեցնող տելեգրամյան հայտնի ալիքը հրապարակել է մի խեղված, կեղծված ձևաթուղթ, որում ես իբր սխալ եմ նշել ուսումնառությանս վայրը, ջնջել, ուղղել և մի ուրիշ սխալ էլ իբր արել եմ սեռի համար նախատեսված դաշտում։Ցավով եմ արձանագրում, որ հայրենիքումս գործող լրատվամիջոցները առանց ինձ հետ կապ հաստատելու, սրա իսկությունը ստուգելու փորձերի իրար հերթ չտալով տարածում են այս ցնդաբանությունը»։

Ամիսներ առաջ մամուլում հայտնվել էր մի տեղեկություն, համաձայն որի՝ Դիլիջանի համայքնապետը համայնքի հողերը օտարում է Երևանի բնակիչներին: Նշենք, որ այս տեղեկությունը Դավիթ Սարգսյանն անգամ չի էլ փորձել հերքել, ինչը, մեղմ ասած, զարմանալի է:

Մամուլը նաև  ահազանգում է, որ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում ընդունել է քաղաքացի Սուրեն Մանուկյանին աճուրդային կարգով հողամաս օտարելու մասին։ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս, Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: