ՀԱՄԱՍ-ը Գազայում 135-օրյա զինադադար է առաջարկել Իսրայելին

Պաղեստինյան ՀԱՄԱՍ խմբավորումն առաջարկել է Գազայի հատվածում 135-օրյա հրադադարի ծրագիր, որի ընթացքում զորքերը դուրս կբերվեն և գերիները կփոխանակվեն, ինչը կարող է ի վերջո մոտեցնել Իսրայելի հետ հակամարտության ավարտին, գրում է Reuters-ը։

Նշվում է, որ նման նախաձեռնություն է առաջ քաշվել՝ ի պատասխան անցած շաբաթ Քաթարի ու Եգիպտոսի միջնորդների կողմից ուղարկված առաջարկի, որին աջակցել են ԱՄՆ-ն ու հրեական պետությունը։

Ծրագիրը ներառում է երեք փուլով իրականացում, որոնցից յուրաքանչյուրը տևում է 45 օր: Առաջին փուլի ընթացքում ՀԱՄԱՍ-ի անդամները պատրաստ են փոխանակել մնացած իսրայելցի պատանդներին՝ կանանց, մինչև 19 տարեկան տղամարդկանց, տարեցներին և հիվանդներին, պաղեստինցի բանտարկյալների՝ կանանց և երեխաների հետ։ Գործակալության տվյալներով՝ Գազայի հատվածը կառավարող խումբը, ի լրումն առաջարկի, ասել է, որ ցանկանում է ազատ արձակել 1500 բանտարկյալների։ Նա կցանկանար ընտրել նրանց մեկ երրորդին Իսրայելի կողմից ցմահ ազատազրկման դատապարտված պաղեստինցիների ցուցակից։

Մնացած տղամարդ պատանդները կազատվեն երկրորդ փուլում, իսկ աճյուններն ու դիակները կփոխանակվեն երրորդ փուլում։ Իսրայելական բանակի դուրսբերման դեպքում վերականգնողական աշխատանքները կսկսվեն նաև Գազայում։

Երրորդ փուլի ավարտին ՀԱՄԱՍ-ն ակնկալում է, որ համաձայնություն ձեռք կբերվի Իսրայելի հետ հակամարտությունը դադարեցնելու վերաբերյալ։

Պաղեստինաիսրայելական հակամարտությունը սրվեց հոկտեմբերի 7-ին Իսրայելի հարավում ՀԱՄԱՍ-ի հարձակումից հետո: Այնուհետև մոտ 1200 իսրայելցի է զոհվել, ավելի քան 250-ը պատանդ են վերցվել գրոհայինների կողմից։ Իսրայելի պաշտպանության բանակը պատասխանեց՝ սկսելով «Երկաթե սրեր» գործողությունը: Ըստ Գազայի առողջապահության նախարարության՝ փետրվարի 6-ի դրությամբ, հակամարտության սկզբից անկլավում զոհերի թիվը կազմում է 27 585, վիրավորների թիվը՝ 66 978։

Հակամարտության ընթացքում հայտարարվել է մեկ զինադադար, որը տևել է նոյեմբերի 24-ից մինչև դեկտեմբերի 1-ի առավոտ։ Զինադադարի ընթացքում ՀԱՄԱՍ-ը ազատ է արձակել 78 իսրայելցի կանանց ու երեխաների, 30 պատանդի՝ այլ երկրներից, իսկ Իսրայելը բանտից ազատել է 240 պաղեստինցիների։