«Հայոց պատմությունը» պետականության չգոյության պատմություն է. Փաշինյան

«Քաղաքացիական պայմանագիր» խմբակցության պատգամավոր Հասմիկ Հակոբյանը ԱԺ-Կառավարություն հարցուպատասխանի ժամանակ հարց հնչեցրեց. «Հայրենիքը պետությո՞ւն է, թե՞ մենք հայրենիքը առանձնացնում ենք պետությունից և հակադրում ենք պետությանը»։

«Բացարձակապես այդպես չէ, որովհետև կառավարությունն ընդամենն արձանագրում է այդ հասկացությունների հարաբերությունները հասկանալու, հետազոտելու, ըմբռնելու անհրաժեշտությունը, որովհետև դրանք ունեն իրար հետ հարաբերություններ, այդ հարաբերությունները պարզ չեն։ Ընդհանրապես, շատ ճիշտ չէ, երբ որ առաջարկ է արվում՝ «եկեք այս հարցը հասկանանք», պատասխանն է՝ «չէ, պետք չէ այդ հարցը հասկանանք, որովհետև ամեն ինչ էլ պարզ է», չէ՛, ոչ մի բան պարզ չի կամ առնվազն շատ բան պարզ չի։ Ինչ վերաբերում է «Հայոց պատմությունը» «Հայաստանի պատմությամբ» առարկան վերանվանելուն, հասկացությունները իրենց տակ ունեն իմաստներ և այդ առաջարկի հեղինակը ես չեմ, բայց վատ չէի զգա, եթե ես լինեի»,- ասաց ՀՀ վարչապետ Նիկոլ Փաշինյանը։