Ինչո՞ւ Զելենսկին ազատեց Զալուժնիին

Ուկրաինայի զինված ուժերի գերագույն գլխավոր հրամանատար Վալերի Զալուժնիի հրաժարականի պատճառը ամառային հակահարձակում իրականացնելու վերաբերյալ ԱՄՆ խորհրդականների առաջարկություններին հետևելուց հրաժարվելն էր։ Այս մասին գրում է Politico-ն՝ հղում անելով ամերիկյան ռազմական աղբյուրին։

Ըստ հրապարակման՝ Զալուժնիի և Պենտագոնի միջև «լուրջ տարաձայնություններ են եղել, թե ինչպես պետք է իրականացվի հարձակումը»։ Նշվում է, որ ԱՄՆ պաշտպանության նախարարությունը պնդել է, որ Ուկրաինայի զինված ուժերը «մեկ հզոր բեկում» իրականացնեն այն ուղղությամբ, որտեղ ամերիկացի շտաբի սպաները դա հնարավոր են համարել։ Սակայն ուկրաինական զորքերը գրոհ են սկսել մի քանի ուղղություններով։

«Մի քանի շաբաթ վիճելուց հետո պարզ դարձավ, որ ուկրաինացիներն ընդհանրապես չէին ցանկանում խորհուրդներ ստանալ ԱՄՆ-ից, նրանք որոշել էին, որ ԱՄՆ զինվորականները խորհուրդների առումով իրենց առաջարկելու ոչինչ չունեն»,- ասվում է Politico-ի հոդվածում։

Թերթի հեղինակները հիշեցրել են նաև Զալուժնիի խոսքերն այն մասին, որ «Ռուսաստանի դեմ պատերազմը մտել է փակուղի»։ Politico-ն նշել է, որ նա դրա համար «կոշտ նկատողություն» է ստացել Ուկրաինայի նախագահ Վլադիմիր Զելենսկու և նրա խորհրդականների կողմից։