Տարեվերջյան խորհրդակցություն` մարզպետների մասնակցությամբ

ՀՀ փոխվարչապետ, տարածքային կառավարման նախարար Արմեն Գեւորգյանի մոտ երեկ տեղի ունեցավ մարզպետների մասնակցությամբ այս տարվա վերջին խորհրդակցությունը:

Ներկայացվեցին համայնքային բյուջեների կատարողականի արդյունքները՝ դեկտեմբերի 28-ի դրությամբ: Փոխվարչապետը հանձնարարեց առաջիկա 2-3 օրվա ընթացքում ամփոփել հավաքագրումների գործընթացը: Անդրադարձ եղավ 2012թ. համայնքների բյուջեների կազմման ընթացքին: Զեկուցվեց, որ բոլոր մարզերում այն հիմնականում ավարտվել է:

Մարզպետներին ներկայացվեց նաեւ «Վարչական հսկողության իրականացման եւ կադրային գործի վարման ընդհանուր դրույթներ» մեթոդական ուղեցույցի նախագիծը (նախագծին հնարավոր է ծանոթանալ ՏԿՆ կայքի «Նախագծեր» բաժնում): Փաստաթղթով առաջարկվում են մեխանիզմներ, որոնք կապահովեն գործընթացի միասնականությունը: Մարզպետներին հանձնարարվեց առաջարկություններ ներկայացնել նախագծի վերաբերյալ:

Տեղեկություններ ներկայացվեցին համայնքային ծառայության բնագավառում 2011թ. ընթացքում կատարված աշխատանքների մասին: Նշվեց, որ ՏԿՆ համայնքային ծառայության հարցերի վարչության կողմից մշտական դիտարկումներ են իրականացվում համակարգի ներդրման գործընթացի նկատմամբ, որոնց վերլուծության արդյունքներով մշակվում եւ ներկայացվում են օրենսդրության կատարելագործմանն ուղղված առաջարկություններ: Մասնավորապես՝ 2011թ. համապատասխան փոփոխություններ են կատարվել ենթաօրենսդրական մի շարք ակտերում:

Դեկտեմբերի 23-ի դրությամբ համայնքային ծառայության պաշտոնները 6789-ն են, որոնցից զբաղեցված են 6377-ը կամ շուրջ 94 %-ը: 2011թ. վերապատրաստվել է 1601, ատեստավորվել՝ 1358 համայնքային ծառայող: Վերապատրաստվել է նաեւ 741 համայնքի ղեկավար եւ ավագանու անդամ, ինչպես նաեւ տարածքային կառավարման մարմինների 74 աշխատակից: Թափուր պաշտոններ զբաղեցնելու համար հայտարարվել է 873 մրցույթ, որոնցից կայացել են 616-ը կամ շուրջ 71 %-ը:

Խորհրդակցությանը փոխվարչապետը մարզպետներին հանձնարարեց նաեւ տեղեկություններ ներկայացնել դպրոցներում ֆինանսավորման խնդիրների, ինչպես նաեւ մարզերում առողջապահական հաստատությունների ֆինանսական վիճակի վերաբերյալ:

Քննարկվեցին նաեւ մթերված գյուղմթերքի դիմաց վճարումների գործընթացի հետ կապված, ինչպես նաեւ մի շարք այլ հարցեր: