Անցնող շաբաթվա ամենակարևոր լուրերի ընտրանին

Ձեր ուշադրությանն ենք ներկայացնում անցնող շաբաթվա ամենակարևոր լուրերի ընտրանին. Եվ այսպես

Փետրվարի 5

Բնապահպանության և ընդերքի տեսչական մարմնի 2023 թ. գործունեության տարեկան հաշվետվությունում ներկայացվել են տեսչական մարմնի գործունեության հիմնական ցուցանիշները: ԲԸՏՄ-ն իրականացրել է 6 ստուգում (5 անտառային տնտեսություն, 1 ԲՀՊՏ) Հայտնաբերվել է 1024 իրավախախտման դեպք, կիրառվել՝ 250 վարչական տույժ, 24.120.000 դրամ տուգանք.

ԱՄՆ Միջազգային զարգացման գործակալությունը 1 միլիոն դոլարի լրացուցիչ աջակցություն է տրամադրել Լեռնային Ղարաբաղից բռնի տեղահանված անձանց․ այդ օգնության շնորհիվ, ԼՂ-ից տեղահանված 19,300 անձ առաջնային մարդասիրական օգնություն կստանա ԱՄՆ ՄԶԳ-ի ֆինանսավորմամբ գործող «Սոցիալական պաշտպանություն, ներառում և հզորացում» ծրագրի միջոցով, որն իրականացնում է «Դիմոքրըսի Ինթերնեյշնլ» կազմակերպությունը։ 

Փետրվարի 6

Ազգային վիճակագրության կոմիտեի տվյալներով 2023 թվականին Հայաստանում ծնվել է 36 265 մարդ, մահացել է 24 305 մարդ: 2023-ին սահմանային անցակետերով Հայաստանից դուրս է եկել 4 793 768 մարդ, իսկ Հայաստան է ժամանել 4 764 274 մարդ:

ԱԺ հերթական նիստի ընթացքում քննարկվել է Ջրային օրենսգրքում լրացումներ և փոփոխություններ կատարելու մասին և կից ներկայացված օրենքների նախագծերի փաթեթը, Մասնագիտական կրթության և ուսուցման մասին և կից ներկայացված օրենքների նախագծերի փաթեթը, Շահումով խաղերի, ինտերնետ շահումով խաղերի և խաղատների մասին օրենքում լրացումներ և փոփոխություններ կատարելու մասին օրենքի նախագիծն ու այլ օրենսդրական նախաձեռնություններ:

Փետրվարի 7

Պաշտոնական այցով Հունգարիայում գտնվող Հայաստանի Հանրապետության նախագահ Վահագն Խաչատուրյանը հանդիպել է  Հունգարիայի վարչապետ Վիկտոր Օրբանի հետ։

ՀՀ ՊՆ վարչական համալիրում Հայաստանի և Լիտվայի պաշտպանության նախարարությունների միջև անցկացվել են երկկողմ պաշտպանական խորհրդակցություններ: Խորհրդակցությունների ավարտին ստորագրվել է Հայաստանի Հանրապետության և Լիտվայի ազգային պաշտպանության նախարարությունների միջև համագործակցության 2024 թվականի ծրագիրը:

Երևան քաղաքի ավագանին արտահերթ նիստի ժամանակ ավագանու մանդատից վաղաժամկետ զրկեց 3 անդամի: Ավագանու անդամներին մանդատից զրկելու հիմնավորումը ավագանու նիստերի կեսից ավելիին բացակայություններն են: Մանդատներից զրկվեցին Նարինե Հայրապետյանը («Մայր Հայաստան» խմբակցություն), Հայկ Մարության  («Ազգային առաջընթաց» խմբակցություն), Սոննա Աղեկյան («Մայր Հայաստան» խմբակցություն):

Փետրվարի 8

Հաագայում Հայաստանի Հանրապետության ԱԳ նախարար Արարատ Միրզոյանը հանդիպում է ունեցել Նիդերլանդների Թագավորության ԱԳ նախարար Հանկը Բրաունս Սլոտի հետ. հանդիպման ընթացքում մտքեր են փոխանակվել հայ-նիդերլանդական երկկողմ օրակարգի և քաղաքական երկխոսության ընդլայնման  հեռանկարների շուրջ: Ընդգծվել են Հայաստանում ժողովրդավարության ու օրենքի գերակայության ամրապնդման ուղղությամբ իրականացված քայլերը և այդ ուղղությամբ հետագա երկկողմ համագործակցության պատրաստակամությունը: 

Ռուսաստանը Հայաստանին կոչ է անում հրապարակային հարձակումների եւ քննադատության փոխարեն սկսել  ՀԱՊԿ-ում գործերի վիճակի քննարկումը, «ՌԻԱ Նովոստի»-ի հարցազրույցում ասել է ՌԴ արտաքին գործերի փոխնախարար Ալեքսանդր Պանկինը։

Հայաստանում Ֆրանսիայի դեսպան Օլիվյե Դեկոտինյին ԵՄ դիտորդական առաքելության հետ այցելել է ռազմական շփման գծից 4կմ հեռավորության վրա գտնվող Նորաբակ գյուղ: Նա այդ մասին հայտնել է X սոցկայքի միկրոբլոգում՝ հրապարակելով հայ գյուղացիների հետ լուսանկար:

Փետրվարի 9

Վարչապետ Նիկոլ Փաշինյանը ներկա է գտնվել Սահմանադրական դատարանի հիմնադրման 28-ամյակին նվիրված միջոցառմանը: Վերջինիս մասնակցել են նաև Հանրապետության նախագահ Վահագն Խաչատուրյանը, Սահմանադրական դատարանի նախագահ Արման Դիլանյանը, Արդարադատության նախարար Գրիգոր Մինասյանը, ՀՀ գլխավոր դատախազ Աննա Վարդապետյանը և այլ պաշտոնատար անձինք:

Հայաստանը վերահաստատում է Եվրամիության միջնորդությամբ Ադրբեջանի հետ բանակցությունները վերսկսելու իր հանձնառությունը։ Այս մասին ամենշաբաթյա ճեպազրույցներում Ազգային ժողովում հայտարարել է իշխող «Քաղաքացիական պայմանագիր» կուսակցության խորհրդարանական խմբակցության քարտուղար Արթուր Հովհաննիսյանը։ Սակայն, ինչպես նշեց պատգամավորը, այս պահին դրանց հնարավոր վերսկսման վերաբերյալ հստակություն չկա։

Փետրվարի 10

Վարչապետ Նիկոլ Փաշինյանը այցելել է Աշխատանքի և սոցիալական հարցերի նախարարության Միասնական սոցիալական ծառայություն՝ կառույցի 2023թ. գործունեության վերաբերյալ հաշվետվությունը քննարկելու նպատակով: 

Փարիզում ՀՀ ԱԳ նախարար Արարատ Միրզոյանը հանդիպում է ունեցել Ֆրանսիայի Հանրապետության Եվրոպայի և արտաքին գործերի նախարար Ստեֆան Սեժուրնեի հետ: Ֆրանսիայի ԱԳ նախարար Ստեֆան Սեժուրնեն նշել է, որ Ֆրանսիան անվերապահ, ամբողջական և մշտական հանձնառություն ունի՝ աջակցելու Հայաստանի ինքնիշխանությանը և անձեռնմխելիությանը:

ՀՀ էկոնոմիկայի նախարարի տեղակալ Նարեկ Տերյանը Բանգլադեշ կատարած աշխատանքային այցի շրջանակում հանդիպել է Դաքայի առևտրաարդյունաբերական պալատի (DCCI) տնօրեն Աշրաֆ Ահմեդի և պալատի անդամների հետ: Հանդիպմանը ներկա է եղել նաև ԻԻՀ-ում ՀՀ առևտրական կցորդ Վարդան Կոստանյանը։