Տեղի է ունեցել Հաղթանակի կամրջի գեղարվեստական լուսավորության շնորհանդեսը

Երևանի քաղաքապետարանի նախաձեռնությամբ մայրաքաղաքի շենքերի ու շինությունների, հուշարձանների, կամուրջների գեղարվեստական լուսավորությունն ապահովելու նպատակով տարբեր բանկային ընկերությունների աջակցությամբ արդեն գեղարվեստական լուսավորությամբ ձևավորվել են մայրաքաղաքի մի շարք հուշարձաններ, մշակութային արժեք ներկայացնող շենքեր ու կամուրջներ։

Հաղթանակի կամրջի գեղարվեստական լուսավորությունն իրականացնելու նպատակով է «Արդշինինվեստբանկ» ՓԲ ընկերությունը տրամադրել է 15 մլն դրամ: Ժամանակակից լուսավորությամբ զարդարվել են կամրջի 200մ երկարություն և 25մ լայնություն ունեցող 35 մետր բարձրությամբ հիմնասյունները:

Հաղթանակի կամրջի գեղարվեստական լուսավորության շնորհանդեսին Երևանի քաղաքապետի տեղակալ Կամո Արեյանը, քաղաքապետ Կարեն Կարապետյանի անունից շնորհավորելով ծրագրի հաջող ավարտի կապակցությամբ, նշել է, որ քաղաքապետարանի և բիզնես կառույցների միջև համագործակցությունը լինելու է շարունակական և օրինակելի՝ նաև մյուս կազմակերպությունների համար:

«Արդշինինվեստբանկ»-ի ղեկավար, բանկի վարչության նախագահ Մհեր Գրիգորյանը, ողջունելով մեր հազարամյա մայրաքաղաքը ժամանակակից լուսային հանդերձանքով ձևավորելու Երևանի քաղաքապետարանի ծրագիրը, նշել է, որ իր ղեկավարած կառույցի համար հաճելի և պատասխանատու է մասնակցությունն այդ ծրագրին, քանի որ դրանով բանկն իր ներդրումն է ունենում Երևանի քաղաքապետարանի հետաքրքիր ձեռնարկման գործում' անչափ գեղեցիկ և մնայուն նվեր մատուցելով երևանցիներին և մայրաքաղաքի հյուրերին:

«Համոզված եմ, որ «Արդշինինվեստբանկ»-ի համագործակցությունը Երևանի քաղաքապետարանի հետ հետագայում ևս շարունակելու է տալ իր տեսանելի արդյունքները»,-նշել է բանկի վարչության նախագահը։

Ի դեպ, «Արդշինինվեստբանկ»-ի հովանավորությամբ իրականացվել է նաև Երևանի Օղակաձև զբոսայգում գտնվող Միքայել Նալբանդյանի հուշարձանի գեղարվեստական լուսավորությունը:

Երևանի քաղաքապետարանի տեղեկատվության
և հասարակայնության հետ կապերի վարչություն