ՔՊ-ականների ուշագրավ գնումները՝ բյուջեի հաշվին. Դիանա Գասպարյան

ՔՊ-ական համայնքապետերը շարունակում են մնալ մեր ուշադրության կենտրոնում՝ կապված վերջիններիս ուշագրավ գնումների հետ:

Այսօր կանդրադառնանք Էջմիածնի համայնքապետ Դիանա Գասպարյանի գնումներին: Դիցուք՝ համայնքապետարանը բավական կլոր գումարի գրենական պիտույքներ է ձեռք բերել մի ՍՊԸ-ից, որը ՊԵԿ օրինախախտների ցանկում է հայտնվել։

Ուշագրավ է նաև համայնքապետարանի 2023 թվականի գնումների պլանը: 450176 հազար դրամ է նախատեսվում անձեռոցիկ, փոշու շոր, մեկանգամյա օգտագործման բաժակներ ձեռք բերելու համար: 325 հազար դրամով համայնքապետարանը նախատեսում է պրոյեկտոր ձեռք բերել: 549 հազար դրամ էլ Գասպարյանի ղեկավարած կառույցը պատրաստվում է ծախսել ֆուրշետների և ծաղկեպսակների վրա։

Ընդ որում, գնումների պլանում տեղի է ունեցել փոփոխություն, որովհետև խրախճանքների վրա նախապես ավելի քիչ գումար է նախատեսված եղել։

2022 թվականի գնումներն էլ ավելի ուշագրավ են, 561 հազար դրամ է ծախսվել՝ Երևան-Փարիզ-Երևան ավիատոմս գնելու վրա։ 

240 հազար դրամ է ծախսվել  27 անձի համար ճաշկերույթ կազմակերպելու նպատակով, 44 հազարի կոնյակ է ձեռք բերվել:

Ի դեպ, ուշագրավ է, որ Էջմիածնի քաղաքապետարանի 2020 թվականի գնումների պլանը տնային տնտեսուհու առևտրի ցուցակ էր հիշեցնում,  գնումների շրջանակն սկսվում է ձնծաղիկից և ավարտվում «ռաշիրիտելի կրիշկայով», զուգարանակոնքի մաքրող միջոց՝ 126 հազար, լվացքի փոշի, մաքրող հեղուկներ, «ավել-սավոկ»  և այլն։ Հետո արդեն գալիս են մեքենաների պահեստամասերը՝ «ռաշիրիտելի կրիշկա», «Զաշիտնիկ» և այլն։ Ի դեպ, պաշտոնական փաստաթուղթ համարվող գնումների պլանում, որը ստորագրել է քաղաքապետը, հենց այդպես էլ ձևակերպել են՝ «ռաշիրիտելի կրիշկա» և «Զաշիտնիկ»։ Դիանա Գասպարյանի առևտուրն ամբողջությամբ կազմել է 20 մլն դրամ՝ մոտ 40 հազար դոլար։

Շարունակելի...