ՔՊ-ականների երկակի ստանդարտները մարզերում

Թեև հեղափոխության օրերին ՔՊ-ականները խոստանում էին երկրում ստեղծել այնպիսի պայմաններ, որ բոլորն օրենքի առջև հավասար լինեն, ժամանակը ցույց տվեց, որ ՔՊ-ականները, այնուամենայնիվ, շարունակում են առաջնորդվել նեղ խմբային շահերով՝ աչք փակելով յուրայինների կողմից օրենքի խախտումների վրա:

Բերենք նման երկակի ստանդարտներով առաջնորդվելու պարզ օրինակ: Շաբաթներ առաջ Երևանի ավագանու ընդդիմադիր անդամներից ոմանք զրկվեցին մանդատներից և որպես պատճառ նշվում էր այն հանգամանքը, որ վերջիններս չեն մասնակցել նիստերի կեսից ավելիին: Ընդ որում, հատուկ ընդգծվում էր, որ նմանատիպ որոշման հիմքում որևէ քաղաքական ենթատեքստ պետք չէ փնտրել: Սակայն, դժվար է դա չանել, երբ ուսումնասիրում ես մարզերի ավագանիներում ՔՊ-ականների հաճախելիության ցուցանիշներն ու այն, թե որքան հաճախ են վերջիններս գլուխ պահում: 

Օրինակ, Թալին խոշորացված համայնքում «Քաղաքացիական պայմանագիր» խմբակցության ավագանու անդամներ Բաբկեն Պողոսյանը եւ Սեւակ Սիմոնյանը 20 կայացած նիստից բացակայել են 7-ական անգամ։  Արթիկ խոշորացված համայնքում «Քաղաքացիական պայմանագիր» խմբակցության ավագանու անդամներ Հայկ Գեւորգյանը 34 նիստից 30-ից բացակայել է, Գոռ Պետրոսյանը՝ 19-ից, Գայանե Սալնազարյանը՝ 21։ 

Որոշ դեպքերում ՔՊ-ականները, իհարկե, մանդատից զրկվել են, սակայն ոչ սեփական թիմակիցների նախաձեռնությամբ և ձեռամբ: Այսպես, 2021 թվականի նոյեմբերի 15–ի համայնքի ավագանու անդրանիկ նիստից մինչև 2023 թվականի հունիս, ավագանու նախաձեռնված 24 և տեղի ունեցած 16 նիստերից «Քաղաքացիական պայմանագիր» կուսակցության ընտրական ցուցակով ընտրված Տաթև համայնքի ավագանու անդամներից մեկն ընդհանրապես չի մասնակցել որևէ նիստի, հինգ ավագանու անդամներ մասնակցել են ընդամենը երկու նիստի, մեկ ավագանու անդամ մասնակցել է երեք նիստի։ Ավագանու լիազորությունները վաղաժամկետ դադարեցնելու համար հիմք է հանդիսացել 2022 թվականի աշնանային նստաշրջանը, քանի որ նշված նստաշրջանի ընթացքում «Քաղաքացիական պայմանագիր» կուսակցության Տաթև համայնքի ավագանիներից 6–ը անհարգելի բացակայել են նստաշրջանի ընթացքում նախաձեռնված և տեղի ունեցած բոլոր նիստերից։

Ստացվում է, որ երբ իշխող քաղաքական ուժը խնդիր ունի պայքարելու ընդդիմախոսների դեմ, ապա վերջիններիս բացակայելը դիտարկում է ոչ հարգելի և զրկում մանդատներից, սակայն նույն սկզբունքը չի տարածվում բացակայելու հանդեպ թուլություն ունեցող իրենց թիմակիցների հանդեպ: Սա ոչ այլ ինչ է, քան երկակի ստանդարտների բացահայտ դրսևորում: