ԵՄ-ն հակառուսական պատժամիջոցները երկարաձգել է մինչև 2025-ի փետրվար

Եվրամիությունը մեկ տարով երկարաձգել է Ռուսաստանի դեմ սահմանված պատժամիջոցները՝ կապված նոր շրջանների` իր կազմի մեջ մտնելու հետ։ Սահմանափակիչ միջոցառումները կգործեն մինչև 2025 թվականի փետրվարի 24-ը։

Այս մասին ծանուցումը հրապարակվել է ԵՄ պաշտոնական ամսագրում: Որոշումն ուժի մեջ կմտնի հրապարակման հաջորդ օրը։

2022 թվականի սեպտեմբերի 30-ին ՌԴ նախագահ Վլադիմիր Պուտինը Դոնեցկի և Լուգանսկի Ժողովրդական Հանրապետությունները, Զապորոժիեի և Խերսոնի շրջանները ներառեց Ռուսաստանի կազմում՝ այնտեղ անցկացված հանրաքվեների արդյունքներով։ Արևմտյան երկրները չեն ճանաչել հանրաքվեների արդյունքները։ 2024 թվականի փետրվարին ամերիկացի լրագրող Թակեր Կառլսոնին տված հարցազրույցում Պուտինն ասաց, որ ՆԱՏՕ-ն տարբերակներ ունի, թե ինչպես «արժանի կերպով» ճանաչել Ռուսաստանի վերահսկողությունը նոր տարածքների նկատմամբ։