Թուրքիայում Չինաստանի օգտին լրտեսելու կասկածանքով 6 մարդու են ձերբակալել

Թուրքական հետախուզական ծառայությունները Ստամբուլում ձերբակալել են վեց մարդու՝ չինական հետախուզության համար աշխատելու կասկածանքով։ Այս մասին հայտնում է Cumhuriyet թերթը՝ հղում անելով իրավապահ մարմինների աղբյուրներին։

Հաղորդվում է, որ ձերբակալվածները տեղեկություններ են հավաքել Չինաստանի Սինցզյան-Ույղուրական ինքնավար շրջանից Թուրքիայում բնակվող մարդկանց և տեղական էթնիկ կազմակերպությունների գործունեությանը նրանց մասնակցության մասին։

Նշվում է, որ յոթ հետախուզվողներից մեկին դեռ չեն հայտնաբերել։

Անկարան արդեն մի քանի տարի է՝ Պեկինին մեղադրում է ույղուրներին ճնշելու մեջ։ Չինաստանը հերքում է իրեն ուղղված մեղադրանքները։