Պաշտոնյաների ուշագրավ գնումները՝ բյուջեի հաշվին. Ռուստամ Բադասյան

Պետեկամուտների կոմիտեն հաճախ հարկատուներին հորդորում է պատշաճ կատարել իրենց հարկային պարտավորությունները։ Իսկ արդյո՞ք ինքը պատշաճ կատարում է իր պարտավորությունները՝ այդ գումարները ծախսելիս։

Դիցուք՝ Պետեկամուտների կոմիտեն Եսայան եղբայրներին պատկանող «Թիմ Սիսթեմս» ընկերության հետ կնքված գնման պայմանագրով անցած տարի ձեռք է բերել սերվերներ և պահոցներ։ Պայմանագրի գինը կազմել է ավելի քան 1 մլրդ 310 մլն դրամ։ Գրեթե այնքան, որքան նախահաշվային գինը։  Պայմանագիրը եղել է երկու չափաբաժնով։ Առաջինով, ըստ Հաշվեքննիչ պալատի հաշվեքննության, ձեռք բերված 8 կոմպոզիտիվ սերվերների գումարը կազմել է 92 մլն դրամ՝ առանց ԱԱՀ-ի։ Այդ սերվերները «Թիմ Սիսթեմսը» գնել է «Էլքոր Դիսթրիբյուշն» ՍՊԸ-ից՝ գրեթե 73,3 մլն դրամով։ Գնման և ՊԵԿ-ին մատակարարման գնային տարբերությունն ավելի քան 18,7 մլն դրամ է։ «Թիմ Սիսթեմսը» սերվերներն իր ձեռքբերման գնից 25,6 տոկոսով բարձր գնով վաճառել է ՊԵԿ-ին։

Մեկ այլ դեպքում ՊԵԿ-ում, նախահաշվային 100 մլն դրամով, խորհրդատվական ծառայությունների գնման մրցույթ են հայտարարել, բայց պայմանագիրը կնքել են 160 միլիոնով։ Այսինքն՝ նախահաշվային գնից 60 միլիոնով ավելի բարձր գնով։

Բացի այդ, ՊԵԿ-ը 1,600,000 դրամի ներկայացուցչական ծառայություններ է ձեռք բերել Արթուր Թամազյան ԱՁ-ից: 1,200,000 դրամի պատվիրակությունների ընդունման հետ կապված ներկայացուցչական ծառայություններ Գաֆեսճեան թանգարան-հիմնադրամից: 391,500 դրամի ներկայացուցչական ծառայություններ են ձեռք բերվել  ԱՁ Սիրվարդ Բաղդասարյանից: 900,000 դրամի ներկայացուցչական ծառայություններ ձեռք են բերվել Արթուր Թամազյան ԱՁ-ից:

Հարկ է նշել նաև, որ  Պետական եկամուտների կոմիտեն հրատապ՝ մեկ անձից գնման ընթացակարգով 29 միլիոն դրամով գնում է կատարել «Արբակ և որդիներ» ՍՊԸ-ից։ Այս ընկերությունը, որն իրականացնում է նախագծային աշխատանքներ և իրավաբանական անձանց պետական ռեգիստրում գրանցված է 2001 թվականից, 29 միլիոն դրամով իրականացնելու էր Մարգարայի հայ-թուրքական սահմանի անցակետի կառուցման նախագծանախահաշվային աշխատանքները։ Մեկ անձից հաջորդ գնումը ՊԵԿ-ը  կատարել է «Արտկոն» ՓԲԸ-ից: Այս ընկերության հետ կնքվել է 250 միլիոն 621 հազար դրամի պայմանագիր՝ Մարգարայի անցակետի կառուցման աշխատանքների առաջին փուլի համար։ Նշենք, որ 250 միլիոնը միայն աշխատանքների մի մասի գումարն է. ընդհանուր անցակետի կառուցման համար ՊԵԿ-ը մեկ անձից գնման ընթացակարգով կնքել է ընդհանուր առմամբ 733 միլիոն դրամի պայմանագիր։