Աբխազիան ցանկանում է միանալ Ռուսաստանի և Բելառուսի հետ միութենական պետությանը

Աբխազիան շահագրգռված է` միանալու Ռուսաստանի և Բելառուսի հետ միութենական պետությանը, հայտարարել է Աբխազիայի նախագահ Ասլան Բժանիան։

«Մենք ցանկանում ենք միասին լինել Ռուսաստանի, Բելառուսի հետ, մենք ցանկանում ենք ակտիվ մասնակից լինել այս ինտեգրացիոն գործընթացին՝ պահպանելով մեր անկախությունը», - ՏԱՍՍ-ին տված հարցազրույցում ասել է Բժանիան։

Նրա կարծիքով, այս միությունը «շահավետ է Ռուսաստանի Դաշնության ժողովրդի, Բելառուսի ժողովրդի և, իհարկե, Աբխազիայի ժողովրդի համար»։ «Կարծում եմ, որ նման դաշինքի ուղղությամբ աշխատելը մեր հարաբերությունների զարգացման ճիշտ վեկտորն է»,- հավելել է նա։

Աբխազիան «մասամբ ճանաչված» պետություն է Անդրկովկասում, որը հռչակվել է Աբխազիայի տարածքում վրաց-աբխազական հակամարտության ժամանակ։ Վրաստանն այս տարածքները համարում է օկուպացված։ ՄԱԿ-ի փաստաթղթերում Աբխազիան համարվում է Վրաստանի տարածք։ Աբխազիայի անկախությունը ներկայումս ճանաչում են Ռուսաստանը, Նիկարագուան, Վենեսուելան, Նաուրուն և Սիրիան։ Բելառուսի իշխանությունները դեռևս որևէ հայտարարություն չեն արել այս հանրապետության ճանաչման վերաբերյալ։